Авлигатай тэмцэх газраас өчигдөр Эрүүл мэндийн сайд Д.Сарангэрэлийг өөрийн хүүгийн жолоочоор ажиллаж байсан хүнийг Хөрөнгө оруулалтын газрын даргаар томилсон” гэх асуудлыг хянан шалгахад, тус яамны Бодлого төлөвлөлтийн газрын Хөрөнгө оруулалтын хэлтсийн даргын албан үүргийг түр орлон гүйцэтгэгч Ө нь Эрүүл мэндийн сайдын төрсөн хүүтэй найз бөгөөд дээрх ажлын байрны саналыг түүнээс авсны үндсэн дээр томилогдсон нөхцөл байдал тогтоогдсон” гэж мэдээлсэн билээ.

УИХ-ын хаврын чуулганы үеэр НББСШУ-ы байнгын хороогоор Эрүүл мэндийн даатгалын сангийн асуудлыг хөндөн ярилцах үеэр Н.Номтойбаяр гишүүн “Төрийн алба дамнасан гэр бүлийн сүлжээ үүсгэчихээд, илтэд эрх ашгийн зөрчил үүсгээд байна” хэмээн Д.Сарангэрэл сайдыг шүүмжилсэн байдаг.

 

Н.Номтойбаяр гишүүний  онцолж хэлсэн “Төрийн албаны сүлжээ” гэдэг нь, Д.Сарангэрэл сайдын нөхөр асан Д.Хүрэлбаатар нь Улсын Ерөнхий Аудитор, түүний хүү Х.Улам-Өрнөх нь  Төрийн өмч, бодлого зохицуулалтын газар/ТӨБЗГ/-ын Худалдан авах ажиллагааны газрын даргаар ажилладагт байсан аж.

АТГ-ын мэдээллээс харахад, Д.Сарангэрэл сайдын хүү Х.Улам-Өрнөх өөрийн жолоочоор ажиллаж байсан Ө-г Эрүүл мэндийн яамны Хөрөнгө оруулалтын хэлтсийн даргын албан тушаалд томилох шийдвэрийг ээжээрээ гаргуулсан гэх хардлага төрүүлж байгаа юм.

ТӨБЗГ-ын Худалдан авах ажиллагааны газрын дарга Х.Улам-Өрнөх нь Ерөнхий сайд  асан Ж.Эрдэнэбатын үед уг албан тушаалд томилогдсон юм байна. ТӨБЗГ-ын Худалдан авах ажиллагааны газар нь төрийн өмчит хуулийн этгээдүүдийн худалдан авах ажиллагааг хариуцдаг гол алба юм. Уг газраас төрийн өмчит хуулийн этгээдүүдэд зарлагдах тендерүүдийг хариуцан зохион байгуулдаг билээ.

 

А.ЦЭЛМЭН

Жолоочоос даргын суудалд томилуулдаг Д.Сарангэрэл сайдын хүү Х.Улам-Өрнөх гэж хэн бэ