Сэтгүүл зүйн шилдэг бүтээлд олгодог "Балдорж" шагнал гардуулах ёслол 10 дахь жилдээ "Улаанбаатар" зочид буудалд болж “Өнөөдөр” сонины сэтгүүлч Т.Энхбат, Ж.Сувдмаа нар “Уул уурхайтай “ханилсан” орчин цагийн малчин” цуврал сурвалжлагаараа 2018 оны "Балдорж" шагналын эзнээр тодорч цом, өргөмжлөл, 5000 ам.долларын эзэн боллоо.
Тэргүүн шагналыг Монгол Улсын хоёр дахь Ерөнхийлөгч Н.Багабанди, “Балдорж” сангийн тэргүүн, “Өнөөдөр” сонины нэгдүгээр орлогч эрхлэгч Б.Номинтүшиг нар гардуулсан юм.
Монгол улсын хөгжилд хамгийн их нөлөөлж буй Уул уурхайн өнөөгийн дүр төрхийг эрэн сурвалжилж 10 мянган км зам туулж бодит амьдралыг олон түмэндээ хүргэсэн залуу сэтгүүлчдийн бүтээл ийнхүү шилдгээр шалгарсан Хэвлэл мэдээллийнхний талархлыг зүй ёсоор хүлээлээ.
Мөн 2018 оны "Балдорж" шагналын дэд байрт МҮОНР-гийн сэтгүүлч Г.Батзаяа, Ж.Золзаяа, найруулагч Б.Лхагвасүрэн нарын хүний эрхийн цуврал нэвтрүүлэг шалгарсан бол шилдэг 10-ын нэгд "Өнөөдөр" сонины сэтгүүлч Х.Уянга “Амьдрал сайн уу”, “Бөөн цагаан нуурын бөөн эмгэнэл” нийтлэлээр, хоёрдугаар байрт ТВ-9 телевизийн сэтгүүлч Д.Ганзориг “Алт дагасан харуусал буюу гэрийн буйрны эрх мэдэл” бүтээлээр, гуравдугаар байрт “Үндэсний шуудан” сонины сэтгүүлч Б.Энхмарт “Бид болон Монголын тал нутаг” нийтлэлээр /2017 оны “Балдорж” шагналтан/, дөрөвдүгээр байрт "25" суваг телевизийн сэтгүүлч Д.Эрдэнэбаяр, Ж.Пүрэвдаваа, зураглаач Г.Мөнхбаяр, Д.Гантөмөр нарын бүтээл “Нэг удаа үндэсний контент Монгол Солонгост нэг удаа” цуврал бүтээл, тавдугаар байрт “Монгол медиа” корпорацийн сэтгүүлч С.Батзаяа “Өв соёлгүй монгол” бүтээл, зургадугаар байрт “Зууны мэдээ” сонины сэтгүүлч Б.Солонго ”Монгол хүнд цэвэр ус хэрэглэх эрх олгоё”, долдугаар байрт “Засгийн газрын мэдээ” сонины сэтгүүлч З.Цэлмэгийн бүтээл тус тус тодорсон бол наймдугаар байрт “Өдрийн сонин"-ы сэтгүүлч Э.Хүрэлбаатарын “Замын Үүдээр зэрлэг адуу мэт чихцэлдэн дайрах монголчууд” нийтлэл шалгарлаа.
Харин "Балдорж” шагналын шилдэг 10-ын есдүгээрт МОНЦАМЭ агентлагийн залуу сэтгүүлч Б.Алтанхуягийн “Аниргүйн гүн дэх цаг хугацаа” нийтлэл шалгарав.
.jpg)
10 дахь шагналын эзнээр сэтгүүлч Н.Хонгорзулын “Монголд үйлдвэрлэв” цуврал нэвтрүүлэг шалгарсан бол Тусгай шагналыг сэтгүүлч Ж.Мандхай хүртсэн юм.
Монголын “Пулитцер” гэж нэрлэгдэх болсон уг шагналыг хүртэхийн төлөө сэтгүүлчид бүтэн жилийн турш бэлтгэж, шударга шүүлтийн доор мэргэжлийн ур чадвараараа өрсөлддөг нь шагналын үнэ цэнэ, өндөр босгыг илэрхийлдэг.
2009 онд анхны "Балдорж" шагналтныг тодруулахад, тухайн үеийн “Үндэсний шуудан” сонины тоймч, сэтгүүлч, өнөөдрийн Монгол Улсын СГЗ, Үндэсний мэдээллийн МОНЦАМЭ агентлагийн дарга Б.Ганчимэг "Асашёорюү Д.Дагвадорж: Ээж аав, нутаг ус, эх орон элэг зүрхэнд минь л эгшиж байдаг юм шүү дээ” ярилцлагаар хүртэж байсан юм.
Түүнээс хойш 2010 онд "Өнөөдөр" сонины сэтгүүлч Д.Оюун-Эрдэнэ, 2011 онд "Өдрийн сонин"-ы сэтгүүлч Ж.Гангаа, 2012 онд "Үндэсний шуудан" сонины сэтгүүлч Г.Отгонбаяр, 2013 онд "Өнөөдөр" сонины сэтгүүлч Ж.Тэгшжаргал, 2014 онд У.Ганбаяр, М.Буянбадрах "Хүрээлэн" төсөл, 2015 онд "Өдрийн сонин"-ы сэтгүүлч Э.Хүрэлбаатар, 2016 онд "Засгийн газрын мэдээ" сонины сэтгүүлч Ц.Цэвээнхэрлэн, 2017 онд "Үндэсний шуудан" сонины сэтгүүлч Б.Энхмарт нар тодорч энэхүү хүндтэй шагналын эзэд болж байв.
Ёслолын ажиллагаанд Монгол Улсын Ерөнхийлөгч асан Ц.Элбэгдорж хүрэлцэн ирснээс гадна УИХ-ын гишүүн Л.Оюун-Эрдэнэ, Б.Ундармаа, Д.Оюунхорол, Ц.Оюунчимэг, НИТХ-ын дарга С.Амарсайхан, НЗД бөгөөд Улаанбаатар хотын захирагч С.Батболд, МСНЭ-ийн Ерөнхийлөгч Х.Мандахбаяр зэрэг улс төр, нийгэм, эдийн засаг, соёлын салбарын зүтгэлтнүүд, хэвлэл мэдээллийн байгууллагуудын удирдлага, сэтгүүлчид хүрэлцэн ирсэн байна.
А.ЦЭЛМЭН
| Балдорж шагналын эзэд тодорлоо |
|
