Нийгмийн хариуцлагынхаа хүрээнд харааны бэрхшээлтэй хүмүүст зориулсан “Харааны бэрхшээлтэй иргэдэд ээлтэй байгууламж” төслийг хэрэгжүүлж эхэлжээ.
Энэхүү төслийг Зориг сан, Швейцарын хөгжлийн агентлагийн хамтарсан “Оюун тэтгэлэгт хөтөлбөр”-ийн оюутнууд болох Youth “beacon” багийнхан санаачилсан байна. “Youth beacon” баг нь ОТИС-ын оюутан Т.Болор-Эрдэнэ, СУИС оюутан Б.Энхжин, МУИС оюутан О.Должинсүрэн, О.Ариунзаяа, Э.Эрхбилгүүн, Б.Улсболд гэсэн 7 гишүүнээс бүрджээ.
Тэд уг төслөөрөө харааны бэрхшээлтэй иргэдэд өдөр тутмын харилцаанд тулгарч буй асуудлуудыг харгалзан тэдэнд төрийн үйлчилгээг хүртээмжтэй хүргэх, нийгмийн харилцаанд эрх тэгш оролцох боломж олгох, цаашлаад амьдрах орчныг сайжруулахад нэмэр болохыг зорьж байгаа юм.
Энэхүү төслийнхөө хүрээнд Сонгино Хайрхан, Чингэлтэй дүүргийн эрүүл мэндийн төвүүдэд Брайль үсгэн План зургийг байршуулсан байна. План зургийг байршуулснаар харааны бэрхшээлтэй иргэд тус объектын талаарх мэдээллийн хялбар авах боломжтой аж.
Мөн үргэлжлүүлж Нийслэлийн Шүд эрүү нүүрний төв, Хан-Уул, Баянгол дүүргийн эрүүл мэндийн төвүүдэд тус план зургийг байршуулах төлөвлөгөөтэй ажиллаж байгаа гэнэ. План зургийг стандартын дагуу Монголын хараагүйчүүдын холбоо хийж гүйцэтгэсэн байна.
Ц.ОРГИЛ
Эрүүл мэндийн төвүүдэд Брайль үсгэн План зургийг байршуулжээ |
|