Сүүлийн үед цахим орчинд нийтлэгдэж буй Зүүн Өмнөд Азийн орнуудад “Өндөр цалинтай ажилд авна”, “Хямд зардлаар аялалд зуучилна” гэх хуурамч зард итгэж Монгол Улсын иргэд зохион байгуулалттай гэмт бүлэглэлийн хараа хяналтад орж, гэмт хэрэгт өртөж хохирох тохиолдол нэмэгдэж байна.

 

Тайланд, Мьянмар, Камбож, Лаос зэрэг орнуудын хар тамхи, мансууруулах бодис, биеэ үнэлэлт, цахим луйврын чөлөөт бүс хууль бус наймааны гол зангилаа “Алтан гурвалжин”-ийн бүсэд зорчсон хохирогчид нь бусдын хүчинд автан тус бүс нутагт шинээр хүн олж авчрах, зуучлах ажлыг гүйцэтгэж байгаа үйлдэл нь нөхцөл байдлыг хүндрүүлж байна.

 

Гэмт этгээдүүд нь хохирогчдын бичиг баримтуудыг хураан авч, тэдний зорчих эрхийг нь хязгаарлан хорьж, өрийн дарамтад оруулан хүч хэрэглэн айлган сүрдүүлэх замаар цэрэгжсэн хамгаалалт дор эрх ашгийг нь зөрчиж, хөдөлмөрийн болон бэлгийн мөлжлөгийн зорилгоор хүн худалдаалах гэмт хэргийн золиос болгож байна.

 

Цагдаагийн байгууллагаас өөрийн улсын хохирогч иргэдийг эх оронд нь аюулгүй буцаан ирүүлэх чиглэлээр Гадаад харилцааны яамны Консулын газар, Тагнуулын ерөнхий газар, Хүйсийн тэгш эрх төв зэрэг төрийн болон төрийн бус байгууллагуудтай хамтран ажиллаж энэ оны эхний 5 сарын байдлаар Бүгд Найрамдах Хятад Ард Улсаас 1, Мьянмарын Холбооны улсаас 13, Бүгд Найрамдах Ардчилсан Лаос Улсаас 7 иргэнийг тус тус Монгол Улсад буцаан ирүүлэх ажлыг зохион байгуулсан.

 

Иймд,  олон нийтийн цахим сүлжээ болон танил, ойр дотны хүмүүсээс тавьсан “Гадаад улсад өндөр цалинтай ажлын байранд зуучлах” саналаас татгалзаж энэ төрлийн мэдээлэл, санал авсан тохиолдолд Эрүүгийн цагдаагийн албаны 51-262425 дугаарын утсанд мэдэгдэж, өөрийгөө болон ойр дотны хүмүүсээ гэмт хэргийн хохирогч болохоос урьдчилан сэргийлэхийг цагдаагийн байгууллагаас сэрэмжлүүлж байна.

"Гадаадад өндөр цалинтай ажилд зуучилна" гэх зарын дагуу хохирогч болж байна гэв