УИХ-ын дарга М.Энхболд өөрийг нь огцруулах санал гаргасан УИХ-ын гишүүдийн саналыг Төрийн байгуулалтын байнгын хороо хэлэлцэж, дүгнэлт гаргах хүртэл парламентын чуулганыг даргалахгүй гэв. Ингэснээр УИХ-ын чуулганыг хэсэг хугацаанд УИХ-ын дэд дарга Л.Энх-Амгалан даргалахаар болж байна. Одоогийн байдлаар чуулганы ирц 42.7 хувьтай байна. Өчигдрийн чуулган мөн л ирц бүрдээгүйн улмаас хуралдаж чадаагүй юм.

 

 

УИХ-ын тухай хуульд зааснаар УИХ-ын даргыг цэц Үндсэн хууль зөрчсөн, шүүх гэмт хэрэг үйлдсэнийг нь тогтоосон, өөрөө өргөдлөө өгсөн гэх гурван тохиолдолд огцруулдаг. Өөрөөр хэлбэл, УИХ-ын гишүүд УИХ-ын даргыг огцруулах санал гаргаж, гарын үсэг цуглуулснаар огцруулах үндэслэл хуульд байдаггүй. Энэ нөхцөлд УИХ-ын Төрийн байгуулалтын байнгын хороо ямар дүгнэлт гаргах нь тодорхой байна.

 

Нэмж мэдээлэхэд, Ерөнхий сайд У.Хүрэлсүх УИХ-ын дарга М.Энхболдыг Үндсэн хууль зөрчсөн гэх хүсэлт гаргаж цэцэд хүргүүлсэн. Цэц дээрх хүсэлтээр маргаан үүсгэж, удахгүй хэлэлцэх учиртай. Цэцийн дүгнэлт ямар гаргахаас УИХ-ын даргын огцрох эсэх шийдэгдэх юм.

 

М.Энхболд УИХ-ын чуулганыг даргалахаас татгалзлаа