Цөөн үгээр:
  • "Мөрдөн шалгах ажиллагааны явцад амь хохирогч Б галт зэвсэг эзэмших сургалтад хамрагдсан, галт зэвсэг худалдаж авсан нь тогтоогдож байна"
  • Зүүн дөрвөн замаас Халдвартын уулзвар хүртэлх замын хөдөлгөөнийг өнөөдөр 23:00 цагт нээнэ
  • Туркийн Истанбул хотод суух Ерөнхий консул Д.Анхбаяр үүрэгт ажилдаа оржээ
МУ-ын Ерөнхий сайд "Covid-19 цар тахлын үеийн хээрийн эмнэлэгтэй танилцлаа
4 жил өмнө   13508

"Covid-19 цар тахлын үеийн харилцан ажиллагаа, хариу арга хэмжээ” дадлага сургуулийн хүрээнд Буянт-Ухаа спорт цогцолборт 300 ортой эмнэлэг, Яармагт шинээр баригдаж байгаа Эх, хүүхдийн нэгдсэн эмнэлэгт 100 ортой эмнэлэг, ОБЕГ-ын харьяа Давтан сургалт, сэргээн заслын төв-113 дугаар ангийг түшиглэн хээрийн эмнэлэг байгуулаад байна. Монгол Улсын Ерөнхий сайд У.Хүрэлсүх, Монгол Улсын Шадар сайд Ө.Энхтүвшин, Эрүүл мэндийн сайд Д.Сарангэрэл, нийслэлийн Засаг дарга бөгөөд Улаанбаатар хотын Захирагч С.Амарсайхан тэргүүтэй албаныхан тус эмнэлгүүдээр явж, бэлтгэл, бэлэн байдалтай нь танилцлаа.

 

Буянт-Ухаа спорт цогцолборыг түшиглэн байгуулсан 300 ортой эмнэлэгт эмнэлзүй, лабораторийн шинжилгээгээр халдвар авсан нь батлагдсан иргэдийг шууд хүлээн авч эмчлэх юм. Энэ эмнэлэгт эмч, эмнэлгийн ажилтан, Мэргэжлийн хяналт, Онцгой байдал, Цагдаа зэрэг мэргэжлийн байгууллагуудын нийт 140 гаруй алба хаагч нэг ээлжинд үүрэг гүйцэтгэж байна.
 
Харин нийслэлийн Эх, хүүхдийн нэгдсэн эмнэлэгт хүндэвтэр буюу хүнд өвчтөнүүдэд эрчимт эмчилгээ хийх 100 ортой эмнэлгийг дэлгэж, үзүүлэх дадлага сургууль явуулж байгаа юм. ОБЕГ-ын харьяа Давтан сургалт, сэргээн заслын төв-113 дугаар ангийг түшиглэн дэлгэсэн Онцгой байдлын байгууллагын хээрийн эмнэлгийн тухайд тус эмнэлэг нь Евро стандартын, хаана ч, ямар ч тохиолдолд дэлгэж, бүх төрлийн эмчилгээ үйлчилгээ явуулах боломжтой II шатлалын хээрийн эмнэлэг юм.
 
Эдгээр эмнэлгийг дэлгэж үзүүлсэн нь болзошгүй эрсдэлийн үед буюу цар тахал дэгдсэн тохиолдолд иргэний байгууламжийг ашиглах загварыг бусад байгууллага, иргэдэд танилцуулах, нөгөөтэйгүүр дайчлагдан ажиллах эмч, эмнэлгийн ажилтнууд, бусад мэргэжлийн байгууллагын алба хаагчдад цар тахлын үед өөрсдийгөө хэрхэн хамгаалах, бусад хүмүүст хэрхэн мэргэжлийн тусламж үйлчилгээ үзүүлэхэд суралцах боломжийг олгож байгаагаараа ач холбогдолтой юм гэж УОК-ын шуурхай штабаас мэдээллээ.
МУ-ын Ерөнхий сайд "Covid-19 цар тахлын үеийн хээрийн эмнэлэгтэй танилцлаа
Сэтгэгдэл
АНХААРУУЛГА: Уншигчдын бичсэн сэтгэгдэлд sodonnews.mn хариуцлага хүлээхгүй болно. sodonnews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Нийт сэтгэгдэл: 0