Цөөн үгээр:
  • "Мөрдөн шалгах ажиллагааны явцад амь хохирогч Б галт зэвсэг эзэмших сургалтад хамрагдсан, галт зэвсэг худалдаж авсан нь тогтоогдож байна"
  • Зүүн дөрвөн замаас Халдвартын уулзвар хүртэлх замын хөдөлгөөнийг өнөөдөр 23:00 цагт нээнэ
  • Туркийн Истанбул хотод суух Ерөнхий консул Д.Анхбаяр үүрэгт ажилдаа оржээ
Монгол Улс Дэлхийн банк группд нэгдэн орсны 30 жилийн ой тохиож байна
3 жил өмнө   510
Монгол Улс Олон улсын сэргээн босголт хөгжлийн банк, Олон улсын хөгжлийн ассоциаци болон Олон улсын санхүүгийн корпорацид нэгдэн орсны 30 жилийн ойг тохиолдуулан УИХын дарга Г.Занданшатар мэндчилгээ дэвшүүллээ.
 
Мэндчилгээнд, "Монгол Улс 1991 оны хоёрдугаар сарын 14-нд Дэлхийн банкны группд 155 дахь гишүүнээр элсэн орж түншлэл, хамтын ажиллагаа байгуулсны 30 жилийн ойн баярын мэндийг хүргэе. Тэр өдрөөс хойш, Монгол Улс Дэлхийн банкны байгууллагуудаас нийт 1.3 тэрбум гаруй ам.долларын санхүүжилтийг хөнгөлөлттэй зээл, буцалтгүй тусламж хэлбэрээр хүлээн авч Монгол Улсын нийгэм, эдийн засгийн олон салбарт 100 гаруй төсөл хэрэгжүүлсэн бөгөөд одоо 16 төсөл амжилттай хэрэгжиж байгааг дурдахад таатай байна.
 
Эдгээр төсөл нь манай улсын ард иргэдийн аж амьдрал, эдийн засгийн өсөлтийг хөхиүлэн дэмжихэд чиглэсэн бөгөөд төслийг хэрэгжүүлэх хугацаанд бидний хамтын ажиллагаа өргөн хүрээнд улам нягтарч ирснийг тэмдэглэхэд баяртай байна.
 
Монгол Улсын эдийн засаг сүүлийн жилүүдэд хурдацтай өсөж, санхүүжилтийн эрэлт хэрэгцээ нэмэгдэж байгаатай холбогдуулан Дэлхийн банкны хөнгөлөлттэй зээл олгодог Олон улсын хөгжлийн ассоциац бүлгээс 2020 оны зургадугаар сарын 30-ны өдөр гарч дараагийн шатны хамтын ажиллагааны хэлбэрт буюу Дэлхийн банкны арилжааны нөхцөлтэй зээл олгодог Олон улсын сэргээн босголт, хөгжлийн банкны бүлэгт 2020 оны долоодугаар сарын 1-ний өдрөөс хамаарагдаж эхлээд байна. Энэ бол бидний хамтын ажиллагааны нэг тодорхой жишээ юм.
 
Монгол Улс Дэлхийн банкны байгууллагуудтай хэрэгжүүлэх цаашдын хамтын ажиллагааны хүрээнд 2021-2025 онуудад хамтран ажиллах Түншлэлийн стратегийн баримт бичгийн төслийг Засгийн газрын 2020-2024 оны үйл ажиллагааны төлөвлөгөө, Монгол Улсын Алсын хараа-2050, Монгол Улсын эдийн засаг, нийгмийг хөгжүүлэх үндсэн чиглэл гэсэн хөгжлийн үндсэн баримт бичгүүдтэй уялдуулан батлаад байгаа.
 
Энэхүү Түншлэлийн стратегийн баримт бичиг нь нэгдүгээрт, Эдийн засгийг сэргээх, эдийн засгийн тогтвортой байдлыг хангахыг дэмжих; хоёрдугаарт, Өрсөлдөх чадварыг нэмэгдүүлж, чанартай ажлын байр бий болгох; гуравдугаарт, Хүмүүн капиталыг өргөжүүлэх ба амьдралын чанарыг дээшлүүлэх гэсэн гурван үндсэн чиглэлийг хамрах юм.
 
Та бүхэнд бидний хамтын ажиллагааны түүхт 30 жилийн ойн баярын мэндийг дахин хүргэе. Мөн монгол түмний уламжлалт цагаан сарын баярын мэндийг дэвшүүлж, эрүүл энх, сайн сайхныг хүсэн ерөөе" гэжээ.
 
Монгол Улс Дэлхийн банк группд нэгдэн орсны 30 жилийн ой тохиож байна
Сэтгэгдэл
АНХААРУУЛГА: Уншигчдын бичсэн сэтгэгдэлд sodonnews.mn хариуцлага хүлээхгүй болно. sodonnews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Нийт сэтгэгдэл: 0