Л.Сэржмядаг: БИ ЭНГИЙН ЗҮЙЛИЙГ ХҮСЭЖ МӨРӨӨДДӨГ

4 жил өмнө 823

Хуваалцах Жиргэх

“Тhe Voice of Mongolia” шоуны шилдэг оролцогч, ҮБХИС-ийн Аюулгүй байдлын сургуулийн Нийгэм хүмүүнлэгийн тэнхимийн цэргийн гадаад харилцааны гуравдугаар дамжааны оюутан Л.Сэржмядагтай ярилцлаа.

Манай сонины уншигчдад өөрийгөө товчхон танилцуулахгүй юу?

-Та бүхэнд энэ өдрийн мэндийг хүргэе. Би Улаанбаатар хотод төрж, өссөн. Айлын том, нэг дүүтэй. Аав, ээж, дүүгийн хамт амьдардаг. Баянгол дүүргийн Эрдмийн өргөө сургуулийг төгссөн.

“Тhe Voice of Mongolia” шоунд оролцох болсон шалтгаан юу вэ?

-Тус шоуг Монгол Улсад анх удаа зохиогдоход нь оролцохоор бүртгүүлэхээр очсон юм. Гэтэл олон улсын чанартай контент тул оролцогчдодоо насанд хүрсэн байх шаардлагыг тавьдаг юм байна лээ. Ингээд л шоунд оролцох хүсэл минь талаар болж “Монгол HD” телевизийн үүднээс буцаж байсан. Гэхдээ тухайн үед би сэтгэлзүйн хувьд бэлэн биш нэлээд зориг муутай байсан гэдгээ ойлгосон. Харин дараагийн “Тhe Voice of Mongolia” шоу зохиогдох сургаар манай найзууд намайг чи ороод үзвэл яасан юм бэ, алдах зүйл байхгүй шүү дээ гэж ятгаж “Монгол HD” телевизийн байр луу чирэх шахам аваад явсан. Тухайн үед бас зориг хүрэхгүй дундаас нь буцчих гээд л байсныг яана.

Санасандаа хүртэл оролцож чадсан уу?

-Тодорхой хэмжээнд өөрийгөө нээж, таньж чадсандаа сэтгэл хангалуун байгаа. Цаашид өөрийгөө илүү хөгжүүлж, дайчилж амжилт гаргана.

Анх хэзээнээс дуулж эхэлсэн бэ, өөр ямар уралдаан тэмцээнд оролцож байсан талаараа сонирхуулахгүй юу?

-Долоодугаар ангиасаа найрал дууны урлагаар хичээллэж эхэлсэн. Намайг ахлах ангид ордог жил нийслэлийн найрал дууны уралдаанд манай сургууль тэргүүн байр эзэлж Олон улсын хүүхдийн найрал дууны тэмцээнд явах эрхээ авч байлаа. Монгол Улс болон сургуулиа төлөөлж явсан 10 сурагч дунд би багтаж багийн дүнгээрээ “Гранфри” шагналыг нь хүртсэн. Тэр цагаас эхлээд л миний дуулах хүсэл улам хүчтэй оргилж эхэлсэн дээ.

Ука шүүгчийн багт мэдээж олон сайхан дурсамжийг бүтээсэн байх ...

-Шоу өөрөө маш том дурсамж. Тэр дундаа Ука шүүгч гайхалтай дурсамжуудын минь нэг хэсэг. Түүнд би маш их талархаж байна. Хамгийн тод санадаг дурсамж гэвэл, Ука шүүгч болон манай багийн Халиунаагийн төрсөн өдөр давхацсан тэр үе юм. Бусад үед байдгаасаа илүү дотно, халуун дулаан уур амьсгал бүрдсэн тэр өдөр л хамгийн сайхан дурсамж болж үлдсэн. Ер нь бэлтгэлийн хугацаанд багийнхан, менежертэйгээ хамт маш нандин дурсамжийг бүтээсэн дээ. Энэ дашрамд, "Монгол HD" телевизийн хамт олонд маш их талархаж байгаагаа илэрхийлэе. Ийм боломж хүн бүрд олдоод байхгүй байх.

Дээрх багт нэгдсэнээрээ ямар зүйлсийг илүү ихээр сурч мэдсэн гэж боддог вэ?

-Ука шүүгч надад гэлтгүй манай багийнханд урлагийн хүн, тайзны хүн болохоос урьтаж хүн өөрөө хүнлэг, энэрэнгүй байх хэрэгтэй гэдгийг маш их ойлгуулсан. Хүнлэг байж, бусдыг хүндэлж чадвал дагаад аз жаргал ирдэг юм. Зөвхөн авьяастай байгаад хүн чанаргүй бол чи өөрийгөө болон авьяасаа үнэгүйдүүлж байгаагаас өөрцгүй гэж их захидаг байсан.

Дууны сонголтууд дээр хэрхэн ажилладаг байсан бэ?

-Эхний шатны дуугаа би өөрөө сонгосон. Гэхдээ яагаад ч юм, тэр үед дөнгөж долоо хоногийн өмнө сонссон дуугаа сонгоод байтал ашгүй амьд хөгжмийн хамтлаг болон “Монгол HD” телевизийн хамт олон сонголтыг минь дэмжиж билээ. Дараагийн шатны хосын үзүүлбэрийн дууг шүүгч нар нь санал болгодог. "The knock out" шатны тухайд, би хэд хэдэн дууг бодож олсон ч хараахан сонголт хийж чадаагүй. Ука шүүгчийн санал болгосон дуучны бүтээл надад их ойр, өнгө хэмнэл нь ч бас тийм санагдсан. Ингээд тэрхүү уран бүтээл дээр ажиллах маш том даалгавар авсан. Хэдийгээр бэлтгэлийн хугацаанд дуулж байсан шигээ тайзан дээр үзүүлж чадаагүй ч тэр том даалгавар болон тэр үе шатыг давж, ямар хүн бэ гэдгээ өөрийгөө бусдад таниулсан гэж боддог. Тийм ч учраас Ука шүүгчид маш их талархдаг.

Энэ шоуны хамгийн хүнд даваа гэвэл ...

-Хамтрагчтай үзүүлбэр хамгийн хүнд санагдсан. Гэхдээ хүндээр эхлээд хамгийн аз жаргалтайгаар төгссөн. Яагаад гэвэл, нэг баг болж, бусадтайгаа уусаж нэгдсэн тийм хүмүүсийг хооронд нь өрсөлдүүлээд хасна гэдэг маш хүнд юм билээ. Энх-Ингүүн бид хоёр шоунаас өмнө зусланд танилцаж байсан. Арай илүү дотно ч юм шиг санагддаг. Түүнтэй өрсөлдөх болсон гэдгээ мэдээд их гайхсан, итгэж чадаагүй. Тэр үед Ука шүүгч бидэнд сэтгэл зүйгээ үргэлж бэлдэх хэрэгтэй гэж зөвлөж байсан. Шалгаруулалтын төгсгөлд Ука шүүгч намайг сонгоход би маш их баярласан ч Энх-Ингүүнийг хасагдахад бас тэр хэрээрээ харамссан л даа. Харин Отгонбаяр шүүгч шүүрээд авахад нь би ялагч болсон юм шиг баярлаж байлаа.

Шоунд оролцохоос өмнөх болон дараах Л.Сэржмядагийн хооронд ямар ялгаа гарсан бэ?

-Нэгд, маш том баг, хамт олонтой танилцсан. Хоёрт, хүний хөдөлмөр, түүний үнэ цэнийг маш ихээр мэдэрсэн. Биднийг тайзан дээр гурван минут дуулахад ард 100, 100 хүн ажилладаг юм билээ. Биднийг үзэгчдэд гоё сайхан харагдуулахын тулд ямар олон хүн нойр, хоолоо хасаж ажилладаг гэдгийг хэзээ ч мартахааргүй мэдэрсэн. Тиймээс би хүний хөдөлмөрийг өмнөхөөсөө илүү ихээр хүндэлж, бас ойлгодог болсон.

Эхний шатанд тэнцэхэд ямар сэтгэгдэл төрж байв ...

-Маш сайхан санагдсан. Ядаж байхад би гэдэг хүн анхны шалгаруулалтын үед дуулахдаа өнгө алдчихсан. Дуу дуусах гээд байдаг, хэн ч эргэж хардаггүй шүү. Итгэл алдрах шахсан энэ үед Ука шүүгч эргэж хараад маш том аз жаргалыг бэлэглэж байсан. Их айдастай эхэлсэн ч маш сайхнаар төгссөн.

Цаашдын зорилгоосоо хуваалцахгүй юу?

-Ямартаа ч үзэгчдэд өөрийн дотор байгаа бяцхан авьяасаа нээж харуулсандаа сэтгэл хангалуун байгаа. Цаашид өөртөө илүү цаг, боломж гаргаад төлөвлөсөн ажлуудынхаа ард гарна. Тэр үедээ үзэгч та бүхэнтэйгээ баяртайгаар уулзана гэж бодож байна.

Шоуны туршид хамт байж, дэмжсэн үзэгчдэдээ хандаж юу гэж хэлэх вэ?

-Бүх хүнд чин сэтгэлээсээ баярлаж байна. Ялангуяа ээждээ маш их баярлалаа, хайртай шүү гэж хэлмээр байна. Мөн гэр бүл, найз нөхөд ҮБХИС-ийн хамт олон, ҮБХИС-ийн захирал, бригадын генерал П.Жаргалан, Нийгэм хүмүүнлэгийн тэнхимийн багш нартаа маш их баярлалаа гэж хэлмээр байна.

Дуулахаас гадна төрөл бүрийн авьяастай гэсэн шүү дээ. Энэ талаар ...

-Сурагч байхаасаа аэробик, волейболын спортоор хичээллэдэг байсан. Аль алинаар нь спортын нэгдүгээр зэрэгтэй. Оюутан болсноосоо хойш байт харваагаар хичээллэж эхэлсэн.

Чөлөөт цагаа юунд зарцуулдаг вэ?

-Сурахыг хүссэн зүйлдээ л зарцуулдаг.

Мөрөөдөлдөө хүрэх замыг хэр хол гэж төсөөлж байна вэ?

-Хүн шиг хүн байж, өөрийн эзэмшсэн мэргэжилдээ эзэн нь болж тайван амгалан амьдрахыг л хүсдэг дээ. Их энгийн мөртлөө эгэлгүй сайхан мөрөөдөл.

Танай гэр бүлд дуучин болон цэргийн хүн байдаг уу?

-Ээж маань маш гоё дуулдаг. Цэргийн хүн байхгүй. Харин би цэргийн хүн болох гээд хүсэж, зорьж, хичээж л явна даа.

Ярилцсанд баярлалаа.

Ц.Оргил

Л.Сэржмядаг: БИ ЭНГИЙН ЗҮЙЛИЙГ ХҮСЭЖ МӨРӨӨДДӨГ

Сэтгэгдэл

АНХААРУУЛГА: Уншигчдын бичсэн сэтгэгдэлд sodonnews.mn хариуцлага хүлээхгүй болно. sodonnews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Нийт сэтгэгдэл: 0