Өчигдөр ОХУ өөрийн бүтээсэн дуунаас хурдан шинэ зэвсэг болох Циркон далавчит пуужингаар тоноглосон тэнгисийн хөлгийг Атлантын болон Энэтхэгийн далайн усанд илгээжээ.

 

“Адмирал флота Советского Союза Горшков” нэртэй байлдааны хөлгийг алсын замд үдэж байгаагаа ОХУ-ын батлан хамгаалахын сайд Сергей Шойгу, тус хөлгийн командлагч Игорь Крохмал нар ерөнхийлөгч Путинд видео холбоогоор илтгэсэн байна.

 

“Энэ удаа тус хөлгийг хамгийн сүүлийн үеийн, өрсөлдөгчгүй зэвсэг болох Циркон дуунаас хурдан пуужингийн системээр тоноглосон юм. Эх орныхоо төлөө үүрэг даалгавраа амжилттай биелүүлээд ирэхийг би хөлгийн багийнханд хүсэн ерөөж байна” гэж Путин хэлжээ.

 

“Адмирал Горшков” хөлөг Газар дундын тэнгис, Атлантын далай, Энэтхэгийн далайд аялах төлөвлөгөөтэйг Сергей Шойгу энэ үеэр мэдээлсэн байна.

 

“Циркон пуужингаар зэвсэглэсэн энэ хөлөг далай болон хуурай газар дахь дайсны байд оновчтой бөгөөд хүчтэй цохилт өгөх чадвартай юм” гэж тэр хэлжээ.

 

Дууны хурднаас ес дахин өндөр хурдаар 1,000 гаруй километр зайд тусах чадвартай Цирконыг ямар ч агаарын довтолгооноос хамгаалах систем зогсоож чадахгүйг Шойгу бас онцолсон юм.

 

Дууны хурднаас доод тал нь дав дахин хурдан ийм зэвсэг бүтээх өрсөлдөөн одоо Орос, Хятад, АНУ улсуудын дунд ид өрнөж байгаа.

 

Ийм зэвсгийн тусах цэгийг тооцоолох технологи нь тив алгасагч баллистик пуужингийнхтай харьцуулахад маш нарийн төвөгтэйд тооцогддог юм байна.

 

 

 

Эх сурвалж: Reuters

Орос улс дуунаас хурдан шинэ зэвсгээ Атлантын болон Энэтхэгийн далайд илгээв