Олон улсын Мэдээлэл зүйн 33 дахь олимпиадыг Сингапур улс 2021 оны зургадугаар сарын 19-25-ны өдрүүдэд онлайнаар амжилттай зохион байгуулж дууслаа. 

 

Энэ удаагийн олимпиадад дэлхийн 88 орны 353 сурагч авьяас чадвараа сорин өрсөлдсөн бөгөөд МУБИС-ийн Мэдээлэл зүйн тэнхимийн эрхлэгч профессор Д.Цэдэвсүрэн, ШУТИС-ийн дэд профессор А.Хүдэр ахлагчтай Монгол Улсын багийн сурагчид амжилттай оролцож, багийн гишүүн Сант сургуулийн 12-р ангийн сурагч А.Нямдаваа мөнгөн медаль хүртлээ. 

 

А.Нямдаваа нь Олон улсын Мэдээлэл зүйн олимпиадад 2018 оноос эхлэн дөрвөн жил дараалан оролцож, 1 алт, 2 мөнгөн медаль хүртсэн Монголын анхны сурагч болж байгаа юм.

 

Түүнчлэн багийн бусад гишүүд болох Сэлбэ сургуулийн 11-р ангийн сурагч Б.Бэлгүтэй, Сант сургуулийн 11-р ангийн сурагч Ш.Билгүүдэй, Нэст сургуулийн 11-р ангийн сурагч Б.Бат-Эрдэнэ амжилттай оролцсонд талархал илэрхийлье.

 

Олон улсын мэдээлэл зүйн олимпиадын үйл ажиллагаанд БШУЯ-ы дэмжлэг үзүүлж, зохион байгуулалтын ажлыг Монголын Мэдээлэл зүйн Олимпиадыг Зохион Байгуулах Хороо (ММЗО НҮТББ), МУБИС, ШУТИС-ийн МХТС-ийн эрдэмтэн багш нар хоёр сарын хугацаанд хариуцан ажилласан юм. Мөн олимпиадын технологийн орчныг бүрдүүлэх, компьютер болон техник төхөөрөмжийн найдвартай ажиллагааг хангахад МУБИС, “Эрин системс” ХХК хамтран ажиллав

 

 

ОУ-ын Мэдээлэл зүйн 33 дахь онлайн олимпиадаас монгол сурагч мөнгөн медаль хүртлээ