Монгол Улсын тусгай хамгаалалттай газрын удирдлагуудыг БОАЖ-ын сайд Д.Сарангэрэл хүлээн авч уулзлаа. Уулзалтаар байгаль орчин, аялал жуулчлалын салбарт тулгамдаж байгаа асуудал, тэдгээрийг хэрхэн шийдвэрлэх, мөн одоогийн мөрдөгдөж байгаа хууль тогтоомж, дүрэм журамд өөрчлөлт оруулах талаар хэлэлцсэн юм. Түүнчлэн Засгийн газрын төвшинд анхаарах шаардлагатай салбарын 10 гол зорилтыг дарга нарт танилцуулж санал сэтгэгдэл солилцлоо. 

 

Үүнд:

 

-Улаанбаатар хотын агаарын бохирдлыг 80 хувь хүртэл бууруулах

 

-Хөвсгөл нуураа хамгаалах. Тэр дундаа хөрсний бохирдлын асуудлын нэн тэргүүнд шийдвэрлэх

 

-Нийслэлийн цэвэр усны асуудлыг шийдвэрлэх

 

-Гэр хороолол, аялал жуулчлалын бүсэд “Эко жорлон” хөтөлбөр хэрэгжүүлэх

 

-Тогтвортой хөгжлийн үзэл баримтлалын асуудалд анхаарал хандуулах

 

-Цэнгэг усны нөөц, гол мөрний 55 хувийг хамгаалалтад авах

 

-Ховордсон ургамал, ан амьтдыг зориудаар өсгөх, бий болгох

 

-Уул уурхайн ажлын улмаас сүйтгэгдсэн газар нутгуудад нөхөн сэргээлтийн ажлыг нэн даруй хийх

 

-Хог хаягдлын асуудлыг ахисан түвшинд шийдвэрлэх

 

- Туул голын нөхөн сэргээлтийг хийх, хог хаягдал хөрсний бохирдлын асуудлыг шийдвэрлэх зэрэг томоохон зорилтууд багтсан.

 

 

 

Энэ үеэр Хөвсгөлийн Улаантайга УТХГ-ын дарга Ж.Төмөрсүх хэд хэдэн асуудлыг хөндсөн юм. Тухайлбал Байгаль хамгаалагчдын нийгмийн асуудал тэр дундаа харилцаа холбооны асуудал амаргүй байна. Байгаль хамгаалагч хүн олон хоногоор хөдөө хээр, уул усаар явдаг. 

 

Тийм үед албан газар, гэр бүлийнхэндээ хаана, яаж яваагаа дуулгаж чаддаггүй. Холбоогүй олон хоног явахад ар гэр санаа зовохоос эхлээд асуудал их гэсэн юм. Мөн 1990-ээд онд батлагдсан Тусгай хамгаалалтын хууль нь дэндүү хоцрогдсон, олон зүйл заалтыг өөрчлөх шаардлагатай байгааг хэлсэн юм. 

 

Мөн УТХГН-ийн хамгаалалтын захиргааны дарга нар байгаль хамгаалагчдын цалинг нэмэх, харилцаа холбооны асуудлыг шийдвэрлэх, эрүүл мэндэд анхаарал хандуулах, тэтгэвэрийн насыг 55 насаар тогтоох, самар хураалтыг хойшлуулах зэрэг асуудлыг шийдвэрлэх шаардлага тулгараад байгааг салбарын сайдад уламжилсан.