Хонконгийн Тай По дүүрэгт байрлах Wang Fuk Court орон сууцны хороололд энэ сарын 26-нд гарсан хүчтэй гал түймрийн хэрэгтэй холбоотойгоор барилгын компанийн гурван эрэгтэйг цагдаа нар баривчилжээ. Ослын улмаас олон хүний амь үрэгдэж, хэдэн зуун хүн сураггүй болсон нь хотын сүүлийн арван жилүүдэд тохиогоогүй томоохон гамшгийн нэг болж байна.

 

Гал түймэр хэрхэн эхэлсэн бэ?

 

Гал барилгын гадна талд байрлуулсан хулсан шат, сэргээн засварын ажлын хэсэгт ашигласан шатамхай бүрээснээс эхэлсэн гэж урьдчилсан дүгнэлт гарчээ. Дулаалгын хөөсөнцөр, гадна тор, хуванцар хучлага зэрэг материалууд галын тархалтыг улам түргэсгэж, хэдхэн минутын дотор хэд хэдэн барилгын фасадаар дамжин дээш, хажуу тийш маш хурдтай дэлгэрсэн байна.

 

Түймэр гарсан үед хорооллын найман орон сууцны блоктой хэсэгт 4,000 гаруй оршин суугч амьдарч байсан бөгөөд гал сөнөөгчид хэдэн зуун хүнийг аврах ажиллагаа зохион байгуулсан ч өндөр температур, утаа, шатсан хулсан бүтэц нурж унах зэрэг нь ажиллагааг хүндрүүлжээ.

 

Хохирлын хэмжээ

 

Албаныхны мэдээлснээр өдгөө дор хаяж 44 хүн амь насаа алдаад байгаа бөгөөд тэдний дунд нэг гал сөнөөгч багтсан байна. Мөн 279 хүн сураггүй байгаа тухай мэдээлэл хэвээр байна. Галыг бүрэн хяналтад авах ажиллагаа нэг өдрийн турш үргэлжилж, тус хорооллын хэд хэдэн барилга ноцтой эвдрэл авчээ.

 

Ойролцоогоор 900 гаруй оршин суугч гэр орноо орхин түр оромжид байрлаж байна. Нүүлгэн шилжүүлсэн иргэдэд хоол хүнс, эмнэлгийн тусламж, сэтгэлзүйн дэмжлэг үзүүлэх ажлыг орон нутгийн байгууллагууд зохион байгуулж эхэлжээ.

 

Баривчилгаа ба мөрдөн шалгалт

 

Гал түймрийн дараах мөрдөн шалгалтын хүрээнд барилгын компанийн хоёр захирал болон нэг инженерийн зөвлөх зэрэг гурван эрэгтэйг баривчилсан байна. Тэднийг барилгын засварын ажилд шаардлага хангахгүй, хэт шатамхай материал ашигласан, аюулгүй ажиллагааны стандартыг ноцтой зөрчсөн хэмээн үзэж, “хүнд хариуцлагагүй байдал”, “хүний аминд хүрсэн байж болзошгүй” гэсэн зүйл ангиар саатуулжээ.

 

Цагдаа нарын мэдээлснээр, засварын ажилд ашигласан гадна торон бүрээс болон хулсан шат нь галын гол эх үүсвэр, тархалтыг хурдасгасан хүчин зүйл болсон байх магадлал өндөр байгаа аж. Мөн барилгын гадна дулаалга болон хамгаалалтын материалууд нь галын аюулгүй байдлын стандартад нийцэхгүй байсныг шалгалтаар тогтоосон байна.

 

Одоогийн нөхцөл байдал

 

Галын шалтгааныг эцэслэн тогтоох шинжилгээ үргэлжилж байгаа бөгөөд барилгын аюулгүй байдал, засварын ажил, ашигласан материалд хяналт тавих журамд өөрчлөлт оруулах боломжийг хотын удирдлага судалж эхэлжээ. Түр байрлуулагдсан иргэдийн аюулгүй байдал, дахин сууцжуулах асуудлыг шийдвэрлэх бие даасан ажлын хэсэг байгуулагдсан байна.

Хонконгийн орон сууцны хороололд гарсан томоохон галтай холбогдуулан гурван хүн баривчлагдлаа