Дэлхийн цэрэг армийн хүчин чадлаараа эхний гуравт жагсдаг хоёр том гүрний дунд, гуравхан сая гаруй хүн амтай ч тусгаар тогтнолынхоо баганыг бат зогсоож буй Монгол Улсын Зэвсэгт хүчин үүсэн байгуулагдсаны 105 жилийн ой өнөөдөр тохиож байна.

 

Энэ өдөр бол зөвхөн дүрэмт хувцастай дайчдын баяр биш, Монгол Улсын оршин тогтнохын бэлэг тэмдэг, эр зориг, тэсвэр хатуужлын баяр юм.

 

Хэдийгээр манай улс 35 мянга орчим идэвхтэй албан хаагчтай, олон улсын үзүүлэлтээр 145 орноос 93-р байрт жагсдаг ч Монгол цэргийн үнэ цэнийг зөвхөн статистик тоогоор хэмжих боломжгүй. 

 

Монгол Улсын нэрийн өмнөөс 20 гаруй мянган дайчин дэлхийн халуун цэгүүдэд энхийг сахиулах үүргээ нэр төртэйгөөр гүйцэтгэсэн. Өдгөөгөөс найман зууны өмнө "Монголын амар амгалан"-г (Pax Mongolica) тогтоож байсан өвөг дээдсийнхээ замаар тэд өнөөдөр хүн төрөлхтний амар амгалангийн төлөө зүтгэж байна. 

 

Монгол дайчдын цөлд ажиллах гайхамшигт чадвар, хатуужил нь АНУ, Герман, Солонгосын мэргэжилтнүүдийг бишрүүлж, дэлхийн цэргийн тактикт жишиг болон үнэлэгдэж байна.

 

 

Эх орныхоо торгон хилээс эхлээд дэлхийн халуун цэгүүдэд үүрэг гүйцэтгэж буй эрчүүд маань өнөөдөр Монгол Улсын хамгийн том "Зөөлөн хүч" (Soft Power) бөгөөд Чингис хааны үр садын бахархал болон хувирчээ.

 

Цэрэг гэдэг бол зөвхөн тушаал биелүүлэгч биш. Энэ бол эх орноо хайрлахын нэр, элгэн саднаа хамгаалахын утга учир, эцэг өвгөдөөс өвлөж ирсэн гал голомтоо сахин хамгаалагч юм.

 

Өнөөдөр "Монгол цэргийн өдөр" буюу бидний хэлж заншсанаар Эрчүүдийн баяр. Эх орныхоо амар амгалангийн төлөө зүтгэж буй мөрдэстэй болон мөрдэсгүй бүх эрчүүддээ, Чингисийн цэргийн цуурайг өнөө цагт цуурайтуулж буй эгэл баатрууддаа 105 жилийн ойн баярын халуун мэндийг хүргэе!

 

Өвөг дээдсийн үргэлжлэл, эх орны батлан хамгаалагчид