Энэ долоо хоногийн УИХ-ын нэгдсэн чуулганаар Монгол Улсын эрүүл мэндийн салбарт томоохон шинэчлэл авчрахуйц Эрхтэн, эд, эс шилжүүлэн суулгах тухай хуулийн шинэчилсэн найруулгын төсөл болон дагалдах хуулиудыг хэлэлцэхээр товлолоо.

 

Одоо мөрдөгдөж буй 2018 оны хууль нь практик шаардлагыг бүрэн хангаж чадахгүй байгаа тул анагаах ухааны дэвшлийг ашиглах, донорын хүртээмжийг нэмэгдүүлэх зорилгоор ийнхүү шинэчлэхээр болжээ.

 

Хуулийн төслийн гол өөрчлөлтүүд:

• Донорын зөвшөөрлийг цахимжуулна: Иргэд нас барсны дараа эрхтэнээ донор болгон үлдээх зөвшөөрлийг иргэний үнэмлэх, жолооны үнэмлэх эсвэл "E-Mongolia" системээр дамжуулан өгөх боломжийг нээнэ. Энэ нь тархины үхэлтэй донороос эрхтэн шилжүүлэн суулгах алтан хугацааг хожилгүй ашиглах боломжийг бүрдүүлэх юм.

• Амьд донорын нийгмийн хамгаалал: Өөрийн эрхтнээ бусдад сайн дураар бэлэглэсэн доноруудад төрөөс үзүүлэх халамж, эрүүл мэндийн хөнгөлөлт, насан туршийн хяналтыг илүү тодорхой болгоно.

• Эд, эсийн банк байгуулах: Зөвхөн бөөр, элэг гэлтгүй эвэрлэг бүрхүүл, арьс, яс зэрэг эд, эсийг хадгалах, тээвэрлэх нэгдсэн тогтолцоог хуульчилж өгнө.

• Ёс зүй ба Хяналт: Эрхтэн шилжүүлэн суулгах үйл ажиллагааг улсын хэмжээнд нэгдсэн зохицуулалтаар хангаж, аливаа хууль бус арилжаа, наймаанаас урьдчилан сэргийлэх хатуу хяналтын механизмыг суулгажээ.

 Хариуцлагын тогтолцоо чангарна

 

Хуулийн төсөлтэй хамт Эрүүгийн хуульд нэмэлт оруулах тухай төслийг хэлэлцэх бөгөөд үүнд эрхтэн, эд эсийг хууль бусаар авах, ашиг олох зорилгоор наймаалахтай холбоотой гэмт хэрэгт хүлээлгэх хариуцлагыг чангатгахаар тусгасан байна.

 

Эрхтэн, эд, эс шилжүүлэн суулгах тухай хуулийн төслийг хэлэлцэнэ