Өчигдөр буюу энэ сарын 25-нд ОУВС-ийн үнэлгээний баг Монголд хүрэлцэн ирсэн. Эхний өдөр Сангийн сайд Ч.Хүрэлбаатар тэргүүтэй албаныхан ОУВС-аас томилогдсон ажлын хэсгийнхэнтэй уулзаж ярилцжээ.

 

Уулзалтаар Монгол Улсын өнөөгийн эдийн засгийн нөхцөл байдал, ойрын хугацааны төлөв байдал, тулгамдаж байгаа асуудлуудын талаар дэлгэрэнгүй ярилцсан байна.

 

Түүнчлэн дэлхий дахины болон манай улсын гол түнш орнуудын худалдаа, бизнес, эдийн засаг, улстөрийн нөхцөл байлын талаар ч хөндөн ярилцсан тухай Засгийн газрын Хэвлэл мэдээлэл, олон нийттэй харилцах хэлтсээс мэдээлсэн.

 

Тус ажлын хэсгийнхэн ОУВС-аас манай улсад хэрэгжүүлж буй “Өргөтгөсөн санхүүжилтын хөтөлбөр”- ийн тавдахь шатны үнэлгээг хийх юм. Өөр нэг олон нийтийн зүгээс хүлээлттэй байгаа асуудал бол төсвийн байгууллагын ажилтан ажилчдын цалинг нэмэх асуудлыг манай зүгээс тавьж хэлэлцэхээр бэлдэж буй.

 

Ц.ОРГИЛ

ОУВС-ийн ажлын хэсгийнхэн тав дахь шатны үнэлгээ хийнэ