“Газар-Агро” ХХК Сэлэнгэ аймгийн Зүүнбүрэн, Баруунбүрэн сумын нутагт махны чиглэлийн үхрийн аж ахуйг эрчимжсэн технологийн дагуу эрхлэх дэд бүтцийг бий болгон, ОХУ-аас “Герефорд” үүлдрийн бух, үнээг импортлон оруулан цэврээр нь үржүүлэн нутагшуулж байна.

Малын удмын сангийн үндэсний төв тус компанитай малын үржүүлэг, биотехнологийн чиглэлээр хамтран ажиллах гэрээг байгуулан хоёр дахь жилдээ ажиллаж байна.

Тус компанийн цэвэр үүлдрийн 11 бухнаас 2017 онд үр үйлдвэрлэх ажлыг явуулын лабораториор гүйцэтгэн 12 мянган тун үрийг гүн хөлдөөн генийн санд технологийн дагуу хадгалжээ.

Энэ жилийн "Газар-Агро" компаниас тавьсан хүсэлтийн дагуу үнээнд хээлийн шалгалт хийж, зохиомол хээлтүүлгийн үр дүнг тооцох, компанийн мал аж ахуйн салбарын ажиллагсад, мэргэжилтнүүдэд зохиомол хээлтүүлэг хийх  техник ажиллагаа,  нөхөн үржихүйн эрхтний бүтэц, үйл ажиллагаа, төллөх үеийн эмгэг, бух, хээлтэй үнээний арчилгаа, маллагааны технологийн чиглэлээр мэдлэг, дадлага олгох сургалтыг зохион байгуулах чиглэлээр төвийн мэргэжилтнүүд ажиллажээ.

2017 онд хээлтүүлсэн үнээний 80.4 хувь нь хээл авсныг малын үржүүлэг, хээлтүүлгийн ажлыг мэргэжлийн түвшинд зохион байгуулсан хэмээн дүгнэжээ. Мөн Сайханаа, Хангай хочтой бухнаас үйлдвэрлэсэн үрээр 80 толгой үнээнд хээлтүүлэг хийж, эхний төлийг хүлээн авснаар дотооддоо үйлдвэрлэсэн үрийн чанарыг баталгаажуулан, ашиглах боломжтойг нотоллоо хэмээн Малын удмын сангийн үндэсний төвийн мэргэжилтнүүд дүгнэж байна.