Б.Гангаамаа нь К2 уулын оргилоос Олон Улсын Уулчдын Холбооны Залуучуудын комиссын гишүүн О.Батсайхантай сансрын утсаар шууд холбогдож хэлэхдээ "К2 уулын оргилд Улаанбаатарын цагаар өнөөдөр 11:00 цагт амжилттай гарлаа. Энд маш хүчтэй салхи шуурч байна. Удаан байж болохгүй учраас яаралтай буух гэж байна. Надтай хамт Нургу Шерпа оргилд хамт гарсан” гэв.

 

Энэ үеэр Нургу Шерпа утсаар "Монголын уулчин Гангаамаа К2 уулын оргилд дөнгөж сая амжилттай гарлаа. Та бүхэнд баяр хүргэе. Одоо Гангаамаа бид хоёр К2 оргил дээр зогсож байна” гэв.

 

К2 оргилд амжилттай гарсан Гангаамаад О.Батсайхан нь нийт Монголын уулчид, дэмжигчдийн өмнөөс халуун баяр хүргэж, болгоомжтой буулт хийж, удахгуй учран золгохын өлзийтэй ерөөлийг дэвшүүлэв. Тэрбээр мөн Б.Гангаамаад бүх талын дэмжлэг туслалцаа үзүүлж буй Нургу Шерпад гүн талархал илэрхийлжээ.

 

Ийнхүү Б.Гангаамаа нь дэлхийн хоёр дахь ноён оргил болох К2 уулын оргилд хөл тавьсан анхны Монгол хүн боллоо. Монголын шилдэг уулчдын К2 оргилд хүрэх гэсэн гурав дахь оролдлого ийнхүү амжилттай болж түүхэн амжилт бүтээлээ гэж Олон Улсын Уулчдын Холбооны Залуучуудын комиссын гишүүн О.Батсайхан, А.Батсүх нар мэдээлжээ.

 

Одоо  Б.Гангаамаа мастерийг уулнаас амжилттай бууж ирэхийг хүлээх үлджээ.

 

 

 

Эх сурвалж: Биеийн тамир, спортын газар