Монголын сагсан бөмбөгийн түүхэнд шинэ хуудас нээгдэж, олон улсын талбарт монгол хүний ур чадварыг тамгалсан түүхэн үйл явдал боллоо. АНУ-ын Оюутны сагсан бөмбөгийн дээд лиг (NCAA Division I)-ийн South Carolina сургуулийг амжилттай дүүргэсэн Ш.Энхийн Од (Mike Sharavjamts) NBA-ийн «Orlando Magic» багтай Exhibit 10 гэрээ байгууллаа.Ингэснээр тэрээр NBA-ийн багтай албан ёсны гэрээ хийсэн анхны монгол сагсан бөмбөгч болж байна.

G League-ийн «Osceola Magic» багт 

Exhibit 10 гэрээний процедурын дагуу Орландо Мэжик баг түүнийг багийнхаа G League (Хөгжлийн лиг)-ийн охин баг болох «Osceola Magic»-т тоглуулах эрхийг (Affiliate rights) албан ёсоор авч үлдсэн юм.Ингэснээр Ш.Энхийн Од NBA-ийн хөгжлийн лигийн «Osceola Magic» багийн бүрэлдэхүүнд шууд нэгдэн, шинэ улирлын тоглолтуудад талбайд гарахаар бэлтгэлдээ орлоо.

NBA-д дэвших хамгийн дөт гарц   

G League нь NBA-ийн үндсэн багууд руу дэвшин тоглох хамгийн ойрхон, бодит талбар юм. Ш.Энхийн Од «Osceola Magic» багт тоглох хугацаандаа ур чадвараа батлан харуулж чадвал «Orlando Magic» болон NBA-ийн бусад багуудаас 10 өдрийн түр гэрээ эсвэл үндсэн гэрээ (Two-Way / Standard NBA contract) авах бүрэн боломж нээгдэж байна.

Түүний 206 см өндөр, талбайн сайн хараа, бөмбөг эзэмшилт болон NCAA-д 4 жил цуглуулсан туршлага нь G League-ийн түвшинд өрсөлдөхөд нь том давуу тал болно гэж мэргэжилтнүүд дүгнэж байна.