Бөхийн төрлүүдийн 2018 оны залуучуудын Азийн АШТ уржигдар Энэтхэгийн нийслэл Шинэ Делид эхэлсэн билээ. Тэгвэл өнөөдөр чөлөөт бөхийн төрөл өнөөдөр эмэгтэйчүүдийн 50, 55, 59, 68, 76 кг-ын жингийн барилдаанаар эхэллээ. Манай улсаас өнөөдөр таван тамирчин зодоглосноос 50 кг-ын жинд Чингэлтэй дүүргийн тамирчин Нандинцэцэгийн Анударь, 55 кг-д Орхон аймгийн “Ирээдүйн одод” дунд сургуулийн тамирчин Баяраагийн Халиунаа, 59 кг-д Баянхонгор аймгийн тамирчин Өлзийсайханы Пүрэвсүрэн, 68 кг-д Дархан-Уул аймаг, “Хасу-Мегастарс” клубийн тамирчин Ганбаатарын Пүрэвцэцэг, 76 кг-д Архангай аймгийн тамирчин Батчулууны Оюунбагана нар хүрэл медалийн төлөө барилдахаар болов.

Хүрэл медалийн төлөө Н.Анударь Иракийн Фатимах Хуссейн Сабеехтэй барилдах байсан ч өрсөлдөгч нь гарч ирсэнгүй. Мөн Б.Халиунаа Кыргызстаны Айбек Артыкали Кызыг 9:7-гоор ялснаар Монголын багийн хоёр дахь хүрэл медалийг авчирлаа. Баянхонгор аймгийн бөх Ө.Пүрэвсүрэн Тайваний Ю Хан Ченийг ялан гуравдахь хүрэл медаь авчирсан бол Г.Пүрэвцэцэг БНХАУ-ын Ман Занд, Б.Оюунбагана хагас шигшээд Кыргызстаны Айпери Медет Кызытэйд тус тус ялагдсан байна.

Ц.ОРГИЛ