“Walk Free Foundation” байгууллагаас гаргасан 2018 оны олон улсын боолчлолын индексээс үзэхэд Хойд Солонгост боолчлол, хүчээр хөдөлмөр эрхлүүлэх явдал хамгийн өргөн дэлгэр тархжээ.

Хойд Солонгост амьдарч буй 10 хүн тутмын нэг нь хүчээр боолын хөдөлмөр эрхэлж байгаа тухай судалгааны дүн гарсан байна. Тус тайлангаас үзэхэд 25 сая хүн амтай Хойд Солонгосоос 2,6 сая хүн боолын хөдөлмөр эрхэлж байгаа бөгөөд цалингийн баталгаагүй ажиллаж байна. Энэ нь нэг улсын хувьд өндөр үзүүлэлт юм.

Түүнчлэн олон улсад 40,3 сая хүн орчин үеийн боолчлолын нөхцөлд амьдарч байгаа аж. Боолчлолыг дэлхий дахинд хүчээр хөдөлмөр эрхлэх, хүчээр гэрлүүлэх, өр төлбөрийн дарангуйлалд оруулах, хүний наймаа хийх зэргээр тодорхойлдог. 

“Walk Free Foundation” нь Австралид төвтэй бөгөөд дэлхий даяар боолчлолыг багасгах, зохицуулах, дорвитой арга хэмжээ авахын төлөө үйл ажиллагаагаа явуулдаг гэнэ. Тус байгууллага 2011-2016 оны хооронд Хойд Солонгосыг орхин явсан 27 эмэгтэй, 23 эрэгтэй нийт 50 хүнээс ярилцлага авсан байна.

Тэд засгийн эрх барьж буй нам ажлын зохицуулалтыг хийдэг, зарим тохиолдолд цалин хөлс өгдөггүй, улсаас суутгаж авдаг талаар хэлжээ.

Заримдаа насанд хүрсэн хүмүүс 70-100 өдөр тасралтгүй ажилладаг. Харин дүрэм зөрчвөл хоолгүй хоцрох эсвэл шийтгэл хүлээнэ. Хүүхдүүдийг хүртэл хөдөө аж ахуй, барилгын салбарт олон нийтийн ажил нэрийдлээр хөдөлмөр эрхлүүлдэг гэнэ.

Эх сурвалж: Business insider