Өнөөдөр буюу нэгдүгээр сарын 30-нд дэлхий даяар Махатма Гандийн дурсгалын өдрийг тэмдэглэж байна. Энэхүү өдөр нь 1948 онд Энэтхэгийн тусгаар тогтнолын төлөөх тэмцлийн удирдагч, энх тайванч зүтгэлтэн Махатма Ганди алагдсан түүхэн өдөртэй давхцдаг юм. Тиймээс түүний амьдрал, үзэл санаа, хүчирхийлэлгүй тэмцлийн замналыг эргэн дурсах зорилготойгоор жил бүр тэмдэглэн өнгөрүүлдэг.

 

Энэтхэг улсад уг өдрийг “Золиослогсдын өдөр” хэмээн нэрлэж, нийслэл Шинэ Дели хот дахь Раж Гхат дурсгалын цогцолборт төрийн удирдлагууд болон иргэд цэцэг өргөн хүндэтгэл үзүүлдэг уламжлалтай. Үүний зэрэгцээ орон даяар нэг минутын нам гүм барьж, энх тайван, эв нэгдлийг бэлгэдсэн арга хэмжээнүүд зохион байгуулдаг байна.

 

Махатма Ганди нь хүчирхийлэлгүй тэмцэл, ёс суртахуун, шударга ёсыг улс төрийн тэмцлийн гол хэрэгсэл болгосноороо дэлхий дахинд хүлээн зөвшөөрөгдсөн түүхэн хүн юм. Түүний үзэл санаа зөвхөн Энэтхэгийн тусгаар тогтнолд нөлөөлөөд зогсохгүй, хүний эрх, иргэний хөдөлгөөн, энх тайвны тэмцэлд дэлхий даяар гүн ул мөр үлдээсэнд тооцогддог.

 

Өнөөдөр НҮБ болон олон улсын байгууллагууд, боловсролын байгууллагууд Гандийн сургаал, энх тайвны үзлийг сурталчилсан уулзалт, хэлэлцүүлэг, сургалт зохион байгуулж байна. Махатма Гандийн дурсгалын өдөр нь хүчирхийлэлгүй байдал, харилцан хүндлэл, энх тайвны үнэт зүйлсийг орчин үеийн нийгэмд дахин сануулах ач холбогдолтой өдөр хэмээн олон нийт үзэж байна.

Нэг сумнаас хүчтэй үзэл: Махатма Гандийг дэлхий даяар дурсаж байна