АНУ болон Армени улсууд энгийнцэг цөмийн эрчим хүчний салбарт хамтран ажиллах хэлэлцээрт гарын үсэг зурлаа. Хэлэлцээрт АНУ-ын дэд Ерөнхийлөгч Ж.Д. Ванс Армени улсад хийсэн албан ёсны айлчлалын үеэр гарын үсэг зурсан байна.

 

Тус баримт бичиг нь АНУ-ын “123 дугаар зүйлийн хэлэлцээр” буюу цөмийн технологийг энхийн зорилгоор ашиглах хамтын ажиллагааны эрх зүйн үндсийг бүрдүүлж байгаа юм. Ингэснээр АНУ Армени улсад цөмийн эрчим хүчний технологи, тоног төхөөрөмж, үйлчилгээ экспортлох боломж нээгдэж байна.

 

Хоёр талын мэдээлснээр, хамтын ажиллагаа нь Олон улсын атомын энергийн агентлаг (IAEA)-ын аюулгүй ажиллагаа, хяналтын стандартад бүрэн нийцсэн байх бөгөөд цөмийн аюулгүй байдал, боловсон хүчин бэлтгэх, техникийн дэмжлэг, судалгаа шинжилгээ зэрэг чиглэлийг хамрах ажээ.

 

АНУ-ын тал Арменид цөмийн эрчим хүчний салбарт ойрын болон урт хугацаанд нийт хэдэн тэрбум ам.долларын бүтээгдэхүүн, үйлчилгээ нийлүүлэх боломжтойг онцолсон байна. Харин Армени улс эрчим хүчний эх үүсвэрээ төрөлжүүлэх, одоо ажиллаж буй Мецаморын атомын цахилгаан станцыг ирээдүйд орлох шинэ реактор барих асуудлыг судалж байгаа юм.

 

Шинжээчдийн үзэж буйгаар энэхүү хэлэлцээр нь Армени улсын эрчим хүчний аюулгүй байдлыг бэхжүүлэхийн зэрэгцээ АНУ-Армени хоорондын стратегийн түншлэлийг шинэ түвшинд гаргах ач холбогдолтой гэж дүгнэж байна.

АНУ, Армени улсууд цөмийн эрчим хүчний салбарт хамтран ажиллана