СӨҮЛ. Өмнөд Солонгосын нэгэн орон нутгийн улс төрч хүн амын бууралтыг шийдвэрлэх арга зам болгон гадаадын эмэгтэйчүүдийг “импортлох” санал дэвшүүлснийхээ дараа намаасаа хасагдажээ.

 

Тодруулбал, Өмнөд Чолла мужийн Жиндо дүүргийн дарга Ким Хи-Сү олон нийтийн арга хэмжээний үеэр төрөлтийн огцом бууралтад хариу арга хэмжээ авахын тулд Вьетнам, Шри Ланка зэрэг орноос залуу, гэрлээгүй эмэгтэйчүүдийг авчирч, орон нутгийн эрчүүдтэй гэрлүүлэх боломжийн талаар дурдсан нь хүчтэй шүүмжлэл дагуулсан юм.

 

Түүний уг мэдэгдлийг олон нийт эмэгтэйчүүдийг эд зүйл мэт авч үзсэн, мөн жендерийн тэгш байдал, хүний эрхийг зөрчсөн хэмээн буруутгасан байна. Түүнчлэн Вьетнамын Сөүл дэх Элчин сайдын яам уг мэдэгдлийг “хүндлэлгүй, зохисгүй” гэж үзэн албан ёсоор эсэргүүцэл илэрхийлжээ.

 

Үүссэн нөхцөл байдалтай холбогдуулан Өмнөд Солонгосын Ардчилсан нам дотоод сахилгын хурал хийж, Ким Хи-Сүг намын гишүүнчлэлээс албан ёсоор хасах шийдвэр гаргасан байна. Намын зүгээс “хүн амын бодлогын асуудлыг хүний нэр төр, тэгш байдлыг үл хүндэтгэсэн байдлаар авч үзэхийг хүлээн зөвшөөрөхгүй” гэж мэдэгджээ.

 

Өмнөд Солонгос нь дэлхийд хамгийн доогуурт тооцогдох төрөлтийн түвшинтэй орнуудын нэг бөгөөд уг асуудлыг шийдвэрлэх бодлогын арга хэмжээ олон жилийн турш маргаан дагуулсаар ирсэн. Гэсэн ч шинжээчид хүн амын бодлогыг эдийн засаг, нийгмийн дэмжлэг, ажлын нөхцөл, жендерийн тэгш байдлын хүрээнд цогцоор нь авч үзэх шаардлагатайг онцолж байна.

 

Энэхүү хэрэг нь төрөлтийн хямралын асуудлыг хэрхэн хөндөх ёстой талаар Өмнөд Солонгос төдийгүй олон улсын хэмжээнд дахин анхаарал татлаа.

“Эмэгтэйчүүдийг импортлох” санаа улс төрийн карьерыг нь дуусгав