БЭЭЖИН. Ойрхи Дорнод дахь геополитикийн хурцадмал байдлаас шалтгаалан олон улсын зах зээл дээр газрын тосны үнэ огцом өссөнтэй холбогдуулан БНХАУ-ын Хөгжил, шинэчлэлийн хороо (NDRC) дотоодын шатахууны жижиглэнгийн үнийг тогтворжуулах тусгай зохицуулалт хийхээр болсноо зарлалаа.

 

Үнийн өсөлтийг "хагаслах" шийдвэр 

 

Хятад улсад мөрдөгддөг шатахууны үнийг ажлын 10  өдөр тутамд шинэчлэн тогтоодог журмын дагуу энэ удаад бензин, дизель түлшний үнэ тонн тутамдаа 2,200 юаниар өсөх тооцоолол гарсан байна. Гэвч иргэд болон аж ахуйн нэгжүүдийн нуруун дээрх үнийн дарамтыг зөөлрүүлэх үүднээс Засгийн газраас интервенц хийж, тонн тутам дахь өсөлтийг 1,160 юань (бензин), 1,115 юань (дизель) болгон хязгаарлалаа. Энэ нь үнийн механизмыг 2013 онд нэвтрүүлснээс хойш анх удаа ийм хэмжээний "түр зохицуулалт" хийж буй тохиолдол юм.

 

Шатахуун түгээх станцуудын ачаалал 

 

Үнэ нэмэгдэх тухай албан ёсны шийдвэр гарахаас өмнө буюу 3 дугаар сарын 23-ны орой Хятадын томоохон хотуудын шатахуун түгээх станцуудад урт дараалал үүсжээ. Жолооч нар үнэ шинэчлэгдэхээс (шөнийн 24:00 цагаас) өмнө амжиж банкаа дүүргэхийг эрмэлзсэн нь зарим бүс нутгийн замд түгжрэл, ачаалал бий болгосон байна. Сошиал медиа сувгуудаар "шатахууны үнийн өсөлт" гэсэн сэдэв хамгийн их хандалттай байгаа бөгөөд 92 октантай бензиний үнэ литр тутамдаа 9 юанийн босгыг давах хүлээлттэй байгаа юм.

 

Нийлүүлэлтийн аюулгүй байдал 

 

Хэдийгээр үнэ өсөж, түр зуурын ачаалал үүссэн ч БНХАУ-ын эрх баригчид шатахууны стратегийн нөөц хангалттай байгааг онцолж байна. Тус улс нь дөрвөн сарын хэрэглээг хангах хэмжээний яаралтай тусламжийн нөөцтэй бөгөөд ОХУ болон бусад эх үүсвэрээс авах газрын тосны нийлүүлэлт хэвийн үргэлжилж байгааг салбарын яамнаас мэдээллээ.

 

Хөгжил, шинэчлэлийн хорооноос зах зээлийн дэг журмыг сахиулах, үндэслэлгүй үнэ хөөрөгдөхөөс сэргийлэх хяналт шалгалтыг чангатгаж, шатахуун боловсруулах үйлдвэрүүдийг тасралтгүй ажиллуулах чиглэл өгөөд байна.

 

Бензиний үнэ өсөх сургаар Хятадын жолооч нар ШТС-уудад оочер үүсгэлээ