УИХ-ын гишүүн Б.Дэлгэрсайхан өөртэй нь холбогдуулан хийсэн цэнхэр үст Цэрэнгийн мэдээлэлд байр сууриа илэрхийллээ. Тэрбээр “Нэгэн үе С.Баярцогтын эсрэг минийхтэй адил тавилттай жүжгийг зохион байгуулалттайгаар хэсэг хүмүүс явуулсан.  Өмнөх Засгийн газрын үед хууль хяналтын байгуулллагад ажиллаж байсан зарим нэг хүмүүсийн оролцоотой тавилттай жүжгээр над руу дайрч, давшилж байгаад харамсаж байна. Миний хувьд ямар нэгэн байдлаар хууль бусаар хийсэн зүйл байхгүй. Миний бие 2016 оноос хойш Швейцарын прокурорт гурван жил шалгагдсан. Шалгагдах хугацаанд Монголын АТГ, Швейцарын прокурор, Английн тагнуул, Хонгконгийн АТГ зэрэг олон газруудаар шалгуулсан. Өөрөөр хэлбэл, би дэлхийгээр шалгуулчихсан, одоо юу хүсээд байгааг нь ойлгохгүй байна. Үүний ард ямар нэгэн ашиг сонирхол байгаа гэдгийг харж байна. Урьд нь С.Баярцогт дээр ийм байдлаар ажилласан хүмүүс түүнээс их хэмжээний мөнгө нэхсэн.

 

Намайг олон улсын гэмт хэрэгтэй холбогдуулан гүтгэсэн цэнхэр үст Цэрэн болон Швейцарь улсын сэтгүүлч нарыг хууль хяналтын байгууллагад шалгуулахаар хандсан. Тодруулж хэлэхэд, С.Баярцогтыг шалгах явцад миний урьд өмнө хийж байсан бизнестэй холбоотой Швейцарын дансыг шалгасан. Энэ олон үйл явдлын давхцал дээр миний бие шалгагдсан юм. 

 

Намайг С.Баярцогт болон тухайн үед эрх мэдэлтэй байсан хүмүүсийг авлигалд зуучилсан, өгсөн гэж яриад байх шиг байна билээ. Намайг 2004 онд уул уурхайн бизнест ороход, С.Баярцогт хэн ч биш байсан. Тухайн үеийн уул уурхайн ордод оруулаагүй гурван шалтгаан байдаг. Нэгдүгээрт, тухайн үед уул уурхайд өөрөө улсын хөрөнгөөр нэг ч хөл тавиагүй байсан газар хувийн хэвшил эрсдэл гарган байж оролцсон. Хоёрдугаарт, энэ нь стратегийн нөөцөд орох хэмжээний нөөц биш байсан. Гуравдугаарт, үүнд С.Баярцогт оролцох ямар ч боломж байхгүй" хэмээв 

 

А.ЦЭЛМЭН

Б.Дэлгэрсайхан: С.Баярцогтын эсрэг минийхтэй адил тавилттай жүжгийг зохион байгуулалттайгаар хэсэг хүмүүс явуулсан