Хөгжлийн бэрхшээлтэй иргэдийн “Сafe more” кофе шоп өнөөдөр нээлтээ хийжээ. Уг шопод харааны 60-90 хувийн бэрхшээлтэй дөрвөн иргэд ажиллаж байгаа юм байна. БНСУ-ын “Siloam” харааны бэрхшээлтэй иргэдийн нийгэмлэг, Олон улсын хамтын ажиллагааны байгууллага “КОЙКА”-гийн санхүүжилтээр уг кофе шопыг нээсэн байна.

Харааны бэрхшээлтэй иргэдийг ажлын байртай болгох “Сafe more” төсөл Монголд хоёр жил үргэлжилж байгаа аж. Төсөл амжилттай байхаас шалтгаалан төслийг цааш үргэлжлүүлэхээ шийднэ гэж санаачлагчид хэлж буй юм. Энэхүү төслийн хүрээнд гурван удаагийн сургалтаар 16 бариста бэлтгэсэн байна. Үүнээс одоогийн байдлаар ес нь ажлын байртай болжээ. Мөн ирэх есдүгээр сард дахин нэг кофе шоп байгуулж, сургалтад хамрагдсан иргэдийн 50-иас илүү хувь нь ажлын байртай болох боломжтой тухай холбогдох албаныхан мэдээллээ.

Дашрамд дуулгахад, Монгол улсад 16000 харааны бэрхшээлтэй иргэн байдаг. Тэд бүгд хөдөлмөр эрхлэхийг эрмэлздэг ч харааны бэрхшээлтэй хөдөлмөрийн насны нийт иргэдийн 4.5 хувь нь л ажил эрхэлдэг аж.

Ц.ОРГИЛ