Оюутолгойн хөрөнгө оруулалтын гэрээтэй холбоотой асуудлыг АТГ-аас шалгаж байгаа. Мөн УИХ-ын гишүүн Д.Тэрбишдагваар ахлуулсан УИХ-аас байгуулагдсан ажлын хэсэг мөн ажиллаж байгаа юм.

Энэ асуудал одоо ямар шатандаа яваа талаар АТГ-ын Мөрдөн шалгах хэлтсийн дарга Э.Идэрцогоос тодрууллаа. Тэрбээр "Төрийн албан тушаалтнуудтай холбоотой хэргийн мөрдөн шалгах ажиллагаа үргэлжилж байгаа. УИХ-аас байгуулагдсан УИХ-ын гишүүн Д.Тэрбишдагваар ахлуулсан ажлын хэсэг мөн давхар ажиллаж байна. АТГ-аас УИХ-аас байгуулагдсан ажлын хэсэгт мэдээлэл өгсөн. Дахиж өгөхөөр бэлдэж байна. Үүнээс илүү дэлгэрэнгүй мэдээлэл өгөх боломжгүй" гэлээ.

Хэргийг сануулбал, Монгол Улсын Засгийн газрын 2009 онд "Оюу толгой" ХХК-тай байгуулсан хөрөнгө оруулалтын гэрээний зарим үүрэг биелэгдээгүй асуудлаар АТГ-аас Мөрдөн шалгах хэлтсээс эрүүгийн хэрэг үүсгэн шалгаж эхэлсэн. Тодруулбал, “Оюу толгой” ХХК нь Засгийн газартай байгуулсан гэрээний дагуу цахилгаан станц барьж ашиглалтад оруулах, Монгол Улсаас цахилгаан эрчим хүч авах үүргээ биелүүлээгүй бөгөөд одоог хүртэл БНХАУ-аас цахилгаан эрчим хүч импортоор авч хэрэглэж байна. Иймээс Хөрөнгө оруулалтын гэрээний 7.3 дахь заалтыг түдгэлзүүлсэн холбогдох эрх бүхий албан тушаалтнуудад Авлигатай тэмцэх газар эрүүгийн хэрэг үүсгэн шалгаж байгаа юм.