Урин дулааны үе, аялал зугаалгын улирал эхэлсэнтэй холбогдуулан иргэд усанд осолдох тохиолдол нэмэгдэх хандлагатай байна.

Долоодугаар сарын 6-наас 13-ныг хүртэл ихэнх нутгаар бороо орж, ялангуяа Хангайн уулархаг нутаг, төв, зүүн аймгуудын нутгаар зарим үед усархаг бороо аадар орох магадлалтайг Цаг уур, орчны шинжилгээний газраас мэдээлж буй.

• Иймд бага насны хүүхдийг гол, усны эрэг дагуу тоглуулахгүй байх,
• хараа хяналтаа сайжруулах,
• архи согтууруулах ундаа хэрэглэсэн үедээ усанд орохгүй байх,
• тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг нийслэлийн Онцгой байдлын газраас анхааруулж байна.

Нийслэлийн Онцгой байдлын газар, нийслэлийн Цагдаагийн газартай хамтран усны ослоос урьдчилан сэргийлэх ажлыг эрчимжүүлэх зорилгоор өнгөрсөн сарын 10-наас эхлэн “Морьт, Завьт эргүүл” арга хэмжээг зохион байгуулж байгаа юм.

НОБГ-ын мэдээлж буйгаар усанд живж, амиа алдсан иргэдийн 90 хувь нь архидан согтуурсан үедээ осолддог байна. Тиймээс арга хэмжээний хүрээнд иргэдийг гэмт хэрэг, зөрчлөөс урьдчилан сэргийлэх, архи согтууруулах ундааны зүйл хэрэглэхгүй байх, үер, усны аюулаас урьдчилан сэргийлэх чиглэлээр санамж сэрэмжлүүлэг тарааж, үер усны аюулаас урьдчилан сэргийлэх талаар яриа таниулга хийж байгаа аж.

Ц.ОРГИЛ