Энэ сарын 14-19-ний өдрүүдэд Хонгконгт болсон “По Леунг Кук”-ийн нэрэмжит бага ангийн олон улсын математикийн олимпиадад оролцсон Монгол хүүхдүүд багийн төрөлд тусгай байрт шалгарч цом, медалиар шагнуулжээ.

Манай улсын баг тус олимпиадад

• Орхон аймгийн дөрөвдүгээр сургуулийн 5 “д” ангийн сурагч Эрдэнэбатын Энхжин, Сүхбаатар аймгийн нэгдүгээр сургуулийн 5 “б” ангийн сурагч Мөнхмандалын Билэгтөгөлдөр,
• Улаанбаатар хотын “Соёмбо” бага сургуулийн 4 “а” ангийн сурагч Чиндэгсүрэнгийн Чингүүн,
• Улаанбаатар хотын “Соёмбо” бага сургуулийн 4 “а” ангийн сурагч Энхбаярын Манлайбаатар нарын бүрэлдэхүүнтэйгээр оролцсон байна.

АНУ, Австрали, БНХАУ, Болгар, ӨАБНУ зэрэг 5 тивийн 20 гаруй орны 36 багийн 144 хүүхэд оролцсон уг олимпиадад Орхон аймгийн дөрөвдүгээр сургуулийн 5 “д” ангийн сурагч Эрдэнэбатын Энхжин хувийн төрөлд хүрэл медаль хүртжээ.

Тус олимпиадад манай улс 2012 оноос оролцож эхэлсэн бөгөөд Э.Энхжин Монгол Улсаас хувийн төрөлд медаль хүртсэн 5 дахь хүүхэд болж байгаа юм. Олон улсын олимпиадад сурагчид хувийн төрөлд 15, багийн төрөлд 10 бодлого бодож уралддаг.

Олон улсын математикийн олимпиадад оролцсон манай улсын багийг Монголын математикийн олимпиадын хорооны гишүүн, доктор Баасанжавын Батцэнгэл ахалсан бөгөөд “Орчлон” сургуулийн математикийн багш Балдандоржийн Ганболд багшаар ажиллажээ. Энэ удаагийн олимпиадад оролцсон манай хүүхдүүд бусад оныхтой харьцуулбал насаар бага байсан нь бас нэг онцлог байсан байна.

Мөн олимпиадын хаалтын ёслолын үеэр болсон урлагийн тэмцээнд манай математикч хүүхдүүд үндэсний бүжгээрээ шалгарч, цом хүртжээ.