Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд өнөөдөр УИХ-ын гишүүн асан Д.Гантулгад холбогдох хэргийн шүүх хурал 10:00 цагт товлогдоод байсан ч хойшиллоо. Тодруулбал хохирогч Ч.Наранзаяа мэс засалд орсны улмаас эрүүл мэндийн шалтгаанаар хуралд оролцох боломжгүй болсон байна. Мөн хохирогч талаас гаргасан хүсэлтийг үндэслэн 2018 оны наймдугаар сарын 24-ний өдрийн 11.00 цагт хаалттай явуулахаар товлон зарласан юм.

Эрүүгийн хуулийн 12.1.1-д:

Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ хэмээн заажээ.

Ц.ОРГИЛ