Ч.Сайханбилэг найман жилийн өмнө их зөв зүйл эхлүүлсэн гэж ярьсан. Би үүнд эсрэг байр суурьтай байгаа. Дубайн гэрээ бол далд уурхайн бүтээн байгуулалт, үр өгөөжийг илт муудуулсан зүйл заалттай гэрээ. Тухайлбал, ил уурхайн төлөвлөгөө 1.4 их тэрбумаар зардал хэтрээд байхад арга хэмжээ аваагүй. Хоёрдугаарт, татвартай холбоотой өнөөдрийн маргааны эхлэлийг тавьсан. Мөн Оюутолгойн олборлолтоос зөвхөн алт, зэсний нөөцөд АМНАТ авна бусад эрдэс баялагт татвар авахгүй гэсэн. Мөн санхүүжилтийн баталгаа гэдэг шинэ нэр томьёо оруулж, түүгээрээ дамжуулж төслийн санхүүжилт бүрээс 1.9 хувийг авдаг алдагдалтай зүйлийг хүлээн зөвшөөрсөн. Би иргэн Ч.Сайханбилэгт хандаж хэлэхэд харь газарт, харийн компанийг өмөөрч суухаар эх орондоо ирж, энэ гэрээг үр өгөөжтэй болгоход сэтгэлээ чилээгээсэй гэж бодож байна.