УИХ дахь Ардчилсан намын бүлгийн дарга О.Цогтгэрэл өнөөдөр “УИХ-ын гишүүд монгол хүний дундаж цалингийн хэмжээгээр цалинждаг болох хэрэгтэй” гэсэн байр суурьтай байгаагаа илэрхийллээ.

 

Ардчилсан намын бүлэг долоо хоног бүрийн даваа гарагт хуралддаг. Тус бүлгийн өнөөдрийн хуралдаанаар цалингийн асуудлыг авч хэлэлцэж, дээрх гаргалгааг гаргасан гэж О.Цогтгэрэл дарга бүлгийн хуралдааны дараа хийсэн мэдээллийнхээ үеэр хэллээ.  

 

Өнөөдрийн байдлаар, монгол хүний дундаж цалин 2.7 сая төгрөг аж. Тухайлбал, эрүүл мэндийн салбарт ажиллагсадын сарын дундаж цалин 2.5 сая төгрөг гэвэл салбарын сайд нь тийм хэмжээний цалин авч, бодит нөхцөл байдлыг үнэлж дүгнэдэг байх нь зөв юм хэмээн тэрбээр үзэж байна.

 

Түүнчлэн тэрбээр эх үүсвэр нь тодорхой бус байдлаар цалин нэмнэ гэдэг татвар, үнийн өсөлтийг нэмэгдүүлнэ гэсэн үг. Тиймээс асуудлыг цогцоор нь авч үзэх шаардлагатай гэж Ардчилсан намын бүлгийн дарга О.Цогтгэрэл мэдэгдэв.

УИХ-ын гишүүд дундаж цалингийн хэмжээгээр цалинждаг болох хэрэгтэй гэсэн байр суурь илэрхийлэв