УИХ-ын дэд дарга Х.Булгантуяаг Үндсэн хууль зөрчсөн гэдгийг Үндсэн хуулийн цэцийн их суудлын хуралдаанаас тогтоосон. Энэ дагуу түүнийг УИХ-ын дэд даргаас чөлөөлж, УИХ-ын гишүүнээс нь эргүүлэн татах асуудлыг хөндөөд байна. УИХ дахь Ардчилсан намын бүлэг Үндсэн хууль зөрчсөн түүнийг УИХ-ын гишүүнээс нь эргүүлэн татах хариуцлагын асуудлыг нэг мөр хэлэлцэх ёстой гэсэн байр суурийг илэрхийлж буй бол Д.Амарбаясгалан, Л.Оюун-Эрдэнийн талынхан УИХ-ын дэд даргаас нь огцруулах асуудлыг түрүүлж хэлэлцэхийг шахаж, гишүүнээс нь эргүүлэн татах асуудлыг сул орхих, мартуулах зальтай ажиллаж байгаа нь юм. 

 

-Х.БУЛГАНТУЯА, Ц.САНДАГ-ОЧИР, П.САЙНЗОРИГ НАРЫГ ТАГНУУЛЫН БАЙГУУЛЛАГААС ШАЛГАЖ ЭХЛЭВ-

 

Дээрхээс гадна иргэн О.Отгонтөгс УИХ-ын дэд дарга Х.Булгантуяа, Төрийн байгуулалтын байнгын хорооны дарга Ц.Сандаг-Очир, УИХ-ын гишүүн П.Сайнзориг нарын гишүүдийн бүрэн эрхийг түдгэлзүүлж, хуулийн хариуцлага тооцуулах асуудлаар Улсын ерөнхий прокурорт гомдол гаргасан бөгөөд тус хэргийг хуулийн байгууллагаас шалгаж эхэлсэн талаар бид мэдээлсэн. Мэдээллийг ЭНД дарж унших. Тодруулбал, өнгөрсөн лхагва гарагт /2025.11.05/ Х.Булгантуяа нарт холбогдох хэргийг харьяаллын дагуу Тагнуулын байгууллагаас шалгаж эхэлсэн. Ингэхдээ Эрүүгийн хуулийн 19.2 дугаар зүйл буюу төрийн эрх мэдлийг хууль бусаар авах, саатуулах гэсэн 12-20 жил хүртэл хугацаагаар хорих ял шийтгэх хэргээр шалгаж байна.

 

 

ВИДЕО:  Х.Ганхуягийн мэдээлэл

 

 

 

Тодруулбал, тэрбээр энэ пүрэв гарагт олон нийтэд мэдээлэл хийж, "УИХ-ын гишүүд Х.Булгантуяагийн асуудлыг шийд, УИХ-ын дэд даргын асуудлыг шийд зэргээр барьцаалж байна. Төсвийн ажлын хэсэг ял наймаалцахгүй. Хуулиар явж байгаа юмыг төсвийн байнгын хороогоор хэлэлцүүлж шийднэ гэж байхгүй шүү дээ. Үндсэн хуулийн цэцийн шийдвэрийг УИХ-ын дэд дарга уншаад л болоо гэсэн үг" гэсэн юм.

 

-АЖЛЫН ХЭСЭГ, БАЙНГЫН ХОРООНД ОРЖ АЖИЛЛАСАН Ч САНАЛ ХУРААХ МӨЧИД ОРХИН ГАРЧ ТӨСВИЙГ ГАЦААЖ БУЙ МӨРТЛӨӨ ХӨШИГНИЙ АРД Х.БУЛГАНТУЯАГИЙН ХЭРГИЙГ ШИЙД ЗЭРГЭЭР ШАХЖЭЭ-

 

Түүний хэлснээр, төсвийн ажлын хэсэгт Д.Амарбаясгалан, Л.Оюун-Эрдэнийн талын гишүүдээс ажлын хэсэг, байнгын хороонд ажилласан байна. Ингэсэн атлаа төсвийн задаргаагаар яг санал хураах мөчид П.Сайнзориг, Ж.Алдаржавхлан, Ч.Номин гээд гишүүд хаяж гарч явжээ. Өөрөөр хэлбэл, ажлын хэсэг, байнгын хороонд байсан мөртлөө санал хураалтыг орхиж гарч, харин АН-ын бүлгийн гишүүд зааланд үлдээд санал хураалтад оролцож, өөрсдийнхөө саналыг хамгаалж үлджээ.

 

 

Гэтэл тэдний яриад буй хөрөнгө оруулалтаас хассан 1.1 их наядын 976 тэрбумыг эмч, багш нарын цалин болон тэтгэврийг нэмэгдүүлэхэд зориулж байгаа гэдгийг Төсвийн байнгын хорооны дарга Х.Ганхуяг хэлсэн. Ийнхүү тус маргаанаас болж өнгөрсөн пүрэв, баасан гарагийн чуулганы хуралдаан замхарч МАН-ын бүлэг завсарлага авч дотооддоо учраа ололцохоор хэдэндээ хуралдсан.  Эцэст нь зургаан асуудлаар чиглэл авахаар Төсвийн байнгын хороонд 2026 оны төсвийн төслийг буцаагаад байна.

 

ВИДЕО: 

 

 

-2026 ОНЫ ТӨСВИЙГ ТӨСВИЙН БАЙНГЫН ХОРООНД БУЦААСАН БӨГӨӨД ЭНЭ САРЫН 15-НД ТӨСВИЙГ БАТЛАХГҮЙ БОЛ АЙМАГ, ОРОН НУТГИЙН ТӨСӨВ ХОЙШИЛНО-

 

Монгол Улсын Төсвийн тухай хуульд зааснаар "Улсын Их Хурал жилийн төсвийн төслийг хэлэлцэн жил бүрийн намрын ээлжит чуулганаар хэлэлцэн 11 дүгээр сарын 15-ны дотор батлах" гэж заасан байдаг. Өөрөөр хэлбэл, Монгол Улс ирэх жилийн төсвөө өмнөх оныхоо 11 дүгээр сарын 15-ны дотор баталж, үүний дараа аймаг, нийслэл төсвөө батлах цагалвартай юм. Хэрвээ улсын төсөв хуульд заасан хугацаандаа батлагдахгүй бол аймаг, нийслэлийн төсөв гацна. Мөн төрийн төлөвлөгөөт санхүүжилт, төрийн албан хаагчдын цалин, тэтгэвэр, тэтгэмж зогсох нөхцөл байдал руу орно гэсэн үг. Эцэст нь Засгийн газрыг огцруулах асуудлаар УИХ-ын үйл ажиллагааг гацааж, Үндсэн хууль зөрчсөн нөгөө дүрүүд улсын төсвийг гацаав. 

 

Эх сурвалж:  Isee.mn

 

“20 хүртэл жил хорих ялтай” хэргээр Тагнуулд шалгагдаж буй Х.Булгантуяа, Ц.Сандаг-Очир, П.Сайнзориг нар Улсын төсвөөр барьцаалж, хэрэг наймаалцах гэснийг илчлэв