МАН-ын Бага хурлын 2-р хуралдаан шинэ сараас өрсөж болов. Парламентад олонхын суудалтай, засгийн эрх мэдлийг барьж байгаа учраас энэ намын үйл хөдлөл олон нийтэд хамааралтай. Нэр бүхий улстөрчдийг хөөсөн гэх мэдээлэл хуурай өвсөнд тавьсан түймэр мэт дэгдсэн, олон нийтийн анхаарлыг тийш чиглүүлчихсэн болохоос тус намын залуу дарга Н.Учралын улс төрийн илтгэл авлигачидтай хайр найргүй тэмцэх, ажил бизнес эрхлэхэд гай тотгор болж байгаа хүнд суртлаас чөлөөлье гэх хоёр үндсэн агуулгатай байв.

 

 

Н.Учрал нэгэнт De facto МАН-ын дарга болсон тул эрх мэдлийг шилжилт бүрэн явагдсаныг харууллаа. Дотроо зодолдсон ч богино хугацаанд маневрлаж, эргээд тэврэлдэж чаддаг нь МАН-ын улс төрийн бусад намаас ялгарах онцлог гэж хэлж болно. Хэрэгт шалгагдаж байгаа тус намын генсекээр хамгийн удаан ажилласан Д.Амарбаясгаланг өмөөрсөнгүй, өмөлзсөнгүй гэх сэтгэгдлүүд цахим орчинд хөвөрсөн нь хоёр талтай. Нэгдүгээрт, МАН дотор эрх мэдлийн шилжилт нэгээс нөгөөд бүрэн очсон учраас танхим дотроос хаацайлах хүн гараагүй болов уу. Байлаа ч авлигатай хатуу тэмцэх бодлогыг сөрж байгаа мэт харагдах учраас үгээ залгицгаасан байх магадлал ч бий.

 

Хоёрдугаарт, авлига МАН-ыг ч, Монголыг ч идэж байна гэсэн агуулга энэ намын удирдлагын өмнөх багийг эс хүссэн ч чиглэнэ. Улс төрийн эрх мэдлээсээ аажмаар шахагдаж байгаа, авлига, албан тушаалын гэмт хэрэгт шалгагдаж байгаа хэсэг энэ хурлын дараа улам хүнд байдалд орлоо. Парламентын олонх итгэл үзүүлээгүй учраас огцорсон экс Ерөнхий сайд Л.Оюун-Эрдэнэ, УИХ-ын даргаас буусан Д.Амарбаясгалан, Үндсэн хууль зөрчсөн нь Цэцээр тогтоогдсон Х.Булгантуяа зэрэг улстөрчийн МАН доторх эрх мэдлээ хүч түрэн хадгалж үлдэх гэсэн өнгөрсөн оны санаархалд Бага хурал нь шинэ онд цэг тавьчихлаа. Одоо тэд МАН-ын цагаан байрандаа биш гудамжинд, цахим орчинд сүүлчийн сумаа тавих нь гарцаагүй. 

 

Ардын намд авлигчид цөөнгүй байгаа нь бодитой. Монгол Улс авлигын төсөөллийн индексээр 124-р байрт жийж яваа. Шившиг л дээ. 2016 оноос хойш УИХ-д үнэмлэхүй олонхын суудал авч засагласан учраас олон нийтээс тасарч, эрх мэдэлдээ эрдэх, нийгмийн хүсэмжлэл, хүлээлтийг үл хайхрах хандлага амь бөхтэй тогтсоныг МАН өөрөө хүлээн зөвшөөрч, авлигачдаасаа салъя гэсэн нь уриа юу, бодит үйл хэрэг үү гэдгийг 2026 он харуулна.

 

 

Юу юугүй л цахим дахь троллуудаа амилуулж, нийгмийг турхираад эхэлж байна. Жил бүрийн хавар сэрдэг улстөржилт дээр МАН-аас шахагдсан авлигачид хүч хаях нь тодорхой болов. МАН-ын хурлын дараах улс төрийн дүр зураг ингэж л харагдаж байна. 

 

Авлигачид нь шахагдсан МАН -ын Бага хурал