Дэлхийн зах зээл дээр газрын тосны үнэ буурч байгаатай холбоотой Улаанбаатар хотын бүх ШТС үнээ буулгасан бөгөөд орон нутгийн үнэ өнөө оройдоо багтаад өөрчлөгдөнө гэж АМГТГ-аас өнөөдөр мэдээллээ.

 

Жижиглэнгийн үнийн хувьд Хангайн бүсийн Орхон, Сэлэнгэ аймгууд дахь А-80 автобензин 250-270 төгрөг, Аи-92 280-310 төгрөг, Аи-95  130 төгрөг, дизелийн түлш 300 төгрөгөөр тус тус буурсан бол Төвийн бүсийн Улаанбаатар хот дахь А-80 270 төгрөг, Аи-92  250 төгрөг Аи-95 180 төгрөг, дизелийн түлш 190 төгрөгөөр буурсан, Зүүн бүсийн Дорнод аймаг дахь А-80 болон Аи-92 тус бүр 300 төгрөг, Аи-95 150 төгрөг, дизелийн түлш 300 төгрөгөөр тус тус буурчээ.

 

Бөөний үнийн хувьд "Магнай Трейд ХХК" -ийн А-80 болон АИ-92 автобензин тус бүр 270 төгрөг, дизелийн түлш 380 төгрөг , "Шунхлай" ХХК-ийн А-80 70 төгрөг, АИ-92 100 төгрөг, дизелийн түлш 150 төгрөг, "Сод Монгол" ХХК-ийн А-80 болон АИ-92, дизелийн түлш тус бүр 150 төгрөгөөр, "Ай Си Ай Си" ХХК-ийн дизелийн түлш 100 төгрөгөөр тус тус буурсан байна.

АМГТГ-ын орлогч дарга Ц.Эрдэнэбаяр: "Дэлхийн зах зээл дээрх шатахууны үнэ цар тахалтай холбоотойгоор буурсан. Цаашид ямар байх нь ОПЕК-ийн орнуудын олборлолтоо бууруулах эсэх шийдвэрээс хамаарна. Урьдчилсан байдлаар баррель нефтийг 9.5 сая тонноор бууруулахаар ярьж байгаа ч эцсийн шийдвэр гараагүй байна. Ерөнхийдөө он гарснаас хойш борлуулалт 30-40 хувь буурсан. Одоогийн хямдарсан үнэ тавдугаар сард хадгалагдана гэж харж байна. Цаашид Сингапурын бирж дээр ажиллах байдлаар үнийг он дуустал тогтвортой байлгахаар ажиллаж байна" гэв.

 

Энэ сарын 7-14-ний өдрүүдэд ОХУ-аас Сүхбаатар боомтоор АИ-80 автобензин 120 тн, Аи-92 8460 тн, Аи-95 112 тн, дизелийн түлш 9815 тн нийт 18,752 тн, Эрээнцав боомтоор Аи-92 автобензин 508 тн. Боршоо боомтоор 402 тн, дизелийн түлш 151 тн нийт 553 тн, Замын-Үүд боомтоор Аи-92 3140 тн буюу нийт 22,953 тн газрын тосны бүтээгдэхүүн импортоор орж ирээд байна.

 

Б.Сайханзаяа

 

Улаанбаатар хотын бүх ШТС үнээ буулгалаа