Сагсан бөмбөгийн "Мекка" гэгдэх НБА-ын талбайд Ази тоглогч мөр зэрэгцэн зогсоно гэдэг нэгэн цагт бүтэшгүй холын зэрэглээ мэт санагддаг байлаа. Гэвч энэхүү хатуу ханыг анхлан нурааж, Ази тивийн нэрийн хуудас болсон эрхэм бол БНХАУ-ын домогт төвийн тоглогч Яо Минь юм. 2002 оны НБА-ын драфтын тэргүүн сонголт болон лигт хөл тавьсан нь зөвхөн нэг улсын бус, нийт Азийн спортын түүхэнд шинэ хуудас нээсэн "тэсрэлт" байв. 229 см өндөр тэрээр төвийн тоглогчийн байрлалд хүчээр бус, уян хатан шидэлт, оюунлаг тоглолтоороо дэлхийг бишрүүлж, Ази хүн амжилтад хүрч чаддагийг баталсан "алтан түлхүүр" болсон билээ.

 

Харин өнөөдөр Монголчууд бид түүнтэй ижил түвшний түүхэн нөлөөг өөрийн эх орноосоо итгэл дүүрэн хүлээж байна. Энэхүү их хүлээлтийн эзэн нь 206 см өндөр хэрнээ холбогч шиг уран чадвартай Ш.Энхийн Од юм. Хэрэв Яо Минь асар өндөр нуруугаараа Азийн үүд хаалгыг хүч түрэн нээсэн бол, Ш.Энхийн Од өвөрмөц тоглолтын хэв маягаараа Монгол сагсан бөмбөгийн үнэ цэнийг дэлхийн дэвжээнд тунхаглахад ойрхон байна.

 

Түүний хамгийн том давуу тал нь 206 см-ийн бие бялдрын өгөгдлийг холбогчийн нарийн мэдрэмж, талбайг харах гоц хараатай хослуулж буй явдал юм. Энэ бол орчин үеийн сагсан бөмбөгийн хамгийн ховор бөгөөд эрэлттэй "универсал" стандарт билээ.

 

Яо Минийг НБА-д хөл тавихад Хятадын сагсан бөмбөг хэдийнэ танигдсан байсан бол, Ш.Энхийн Одын хувьд тэрээр "Монгол" гэх нэрийг дэлхийн скаутуудын дэвтэрт анхлан сийлж буй гэдгээрээ онцлог.

 

АНУ-ын NCAA-ийн дээд түвшний лигт үзүүлж буй тоглолт бүр нь Монгол хүний оюуны бяд, тэсвэр хатуужлын тамга юм. Хэрэв "Майк" НБА-д хөл тавьж чадвал энэ нь ганц тоглогчийн амжилт биш, дараагийн үеийн залууст зам заах "түүхэн луужин" болон үлдэнэ.

 

 

Майк НБА-д хөл тавьж чадвал дараагийн үеийн залууст зам заах "Түүхэн луужин" болно