Цөөн үгээр:
  • Прокурорын байгууллагаас өмчлөх эрхийн эсрэг 92 хэргийг шүүхэд шилжүүлсэн байна
  • Хан-Уул дүүргийн хог тээврийн үйлчилгээнд парк шинэчлэл хийж, зориулалтын зургаан авто машин хүлээлгэн өгчээ
  • Хонконг гаднаас ирж буй иргэдийг ажиглах байранд долоо биш, ГУРАВ хоног тусгаарлахаар болжээ
ДЭМБ: Онц байдал зарлахгүй гэж мэдэгдлээ
2 сар өмнө   152
Дэлхийн эрүүл мэндийн байгууллага /ДЭМБ/ сармагчны цэцэг өвчний тархалттай холбогдуулан одоогоор олон улсын хэмжээнд онцгой байдал зарлахгүй байхаар шийдвэрлэжээ. Уг өвчний тохиолдлууд эндемик бус олон оронд бүртгэгдээд байгаа юм.
 
ДЭМБ-ын тэргүүн Тедрос Адханом Гебрейесус өнгөрсөн долоо хоногийн сүүлээр болсон олон улсын шинжээчдийн хорооны хуралдааны дүгнэлтэд үндэслэн дээрх шийдвэрийг гаргажээ. Тодруулбал, 16 шинжээч халдварын өнөөгийн нөхцөл байдал олон улсын хэмжээнд онцгой байдал зарлах хэмжээнд хүрээгүй гэсэн дүгнэлтэд хүрчээ.
 
Гэсэн хэдий ч халдварын тархалт нь хамтын хариу арга хэмжээ авах шаардлагатай “үүсэн бий болж буй аюул заналхийлэл”-ийг илтгэж байгааг тэрбээр онцолсон байна. ДЭМБ-ын мэдээллээр, сармагчны цэцэг нь Африкийн орнуудад голчлон тархдаг, аминд халтай өвчин юм.
 
Харин Европ, АНУ-д энэ оны тавдугаар сараас уг халдварын тохиолдлууд нэмэгдэх болсон бөгөөд өнгөрсөн долоо хоногт Азид анхны тохиолдлууд илэрсэн нь Сингапур, БНСУ, Тайваньд бүртгэгджээ. ДЭМБ-д тавдугаар сарын эхэн үеэс хойш уг өвчний 3000 гаруй тохиолдол 47 оронд илэрсэн талаар мэдээлэл ирсэн байна.
 
Эндемик бус орнуудад ийнхүү батлагдсан тохиолдлуудын дийлэнх нь эрэгтэйчүүд байгаагийн дунд ижил хүйстэн, бисексуал эрчүүд олон байна. Сармагчны цэцэг нь халдвар авсан хүний шархтай хэсэгт хүрсэн тохиолдолд халдварладаг. Түүнчлэн жирэмсэн эмэгтэйчүүд, хүүхдүүд халдвар авсан тохиолдолд хүндээр өвчлөх эрсдэлтэй байдаг.
 
Халдварын далд үе 5-21 хоног үргэлжилдэг бөгөөд халдвар авсан тохиолдолд халуурах, арьсан дээр тууралт гарах, арьс салст гэмтэх зэрэг шинж тэмдэг илэрдэг байна. Хэдийгээр сармагчны цэцэг өвчин нь аминд халтай ч эмчлэгддэг. Уг өвчний эсрэг салхин цэцгийн вакциныг хэрэглэдэг ч ДЭМБ одоогоор нийтийг хамарсан вакцинжуулалт шаардлагагүй гэж үзэж байна. 
ДЭМБ: Онц байдал зарлахгүй гэж мэдэгдлээ
Сэтгэгдэл
АНХААРУУЛГА: Уншигчдын бичсэн сэтгэгдэлд sodonnews.mn хариуцлага хүлээхгүй болно. sodonnews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Нийт сэтгэгдэл: 0