"Голден Стэйт Уорриорс" багийн супер од Стефен Карри Хятадын спортын хувцас, хэрэглэлийн аварга "Li-Ning" компанитай түншлэлийн гэрээ байгуулснаа мэдэгдэв.

 

Өдгөө 38 настай тэрээр өнгөрсөн жил АНУ-ын "Under Armour" компанитай байгуулсан 12 жилийн гэрээгээ дуусгавар болгосноос хойш өөрийн нэрийн пүүз, спортын хувцасны брэндээ хөгжүүлэх шинэ түнш хайх эрх чөлөөтэй болоод байсан юм.

 

Карри болон "Li-Ning" брэндүүд шинэ бүтээгдэхүүнүүд дээр хамтран ажиллахаас гадна АНУ болон Хятад улсад түүний нэрийн сүлжээ дэлгүүрүүдийг нээхээр төлөвлөж байна. Гэрээний санхүүгийн дүнг одоогоор нууцалж байгаа аж.

 

Стефен Каррийг эгнээндээ нэгтгэсэн нь "Li-Ning" компанийн хувьд "Anta" зэрэг Хятадын бусад брэндүүдийн адил олон улсын зах зээлд хүч түрэн орох томоохон алхам болж байна.

 

Карри өөрийн бизнесийн "Thirty Ink" цахим хуудсанд байршуулсан видео бичлэгтээ энэхүү түншлэл нь "Li-Ning"-ийг АНУ-ын зах зээлд өргөжин тэлэхэд тусална гэдгийг онцолжээ. Тус брэнд нь өдгөө Ази даяар 7,000 гаруй салбар дэлгүүртэй юм.

 

Энэхүү гэрээ нь Карригийн Хятадын брэндтэй хамтарч буй анхны тохиолдол болж байна. Тэрээр замналынхаа эхэнд "Nike"-тай хамтран ажиллаж байгаад дараа нь "Under Armour" руу шилжиж байсан түүхтэй.

 

Ингэснээр тэрээр Хятадын брэндүүдтэй гэрээ байгуулсан NBA-гийн одуудын урт цуваанд нэгдэж байна. Үүнээс өмнө Двэйн Вэйд, Жимми Батлер нар "Li-Ning"-тэй, харин Клей Томпсон, Кайри Ирвинг нар "Anta" брэндтэй гэрээ байгуулаад байсан юм.

 

Өмнө нь олон улсын брэндүүдийн гутлыг гэрээгээр үйлдвэрлэдэг байсан "Anta" компани нь "Fila" зэрэг барууны фирмүүдийн эрхийг худалдаж авах замаар дэлхийн зах зээлд хүчээ авсан. Түүнчлэн тэд энэ жил "Puma" компанийн гол хувьцааг худалдан авч, тус брэндийг Хятадын зах зээлд өсөн нэмэгдэхэд нь туслахаа амлаад байгаа билээ.

 

Барууны олон брэндүүд Хятадын зах зээлд байр сууриа бэхжүүлэхийг эрмэлзэж байгаа ч хямд үнэтэй бүтээгдэхүүн санал болгодог дотоодын үйлдвэрлэгчдийн ширүүн өрсөлдөөнтэй тулгарч байна. Мөн Хятад дахь дотоодын хэрэглээний зарцуулалт буурснаас шалтгаалж эрэлт саараад байгаа юм.

 

Карри энэхүү гэрээний талаар хэлэхдээ, уг түншлэл нь түүний брэндэд сагсан бөмбөг, гольф болон бусад спортын чиглэлээр дэлхийн хэмжээнд өсөх "нөөц бололцооны өргөн боломж"-ийг олгоно гэлээ.

 

Тэрээр "Бид Li-Ning-ийн хэдийнэ бий болгосон амжилт дээр тулгуурлан, улам их өсөлтийг бий болгохыг зорьж байна. Энэ хүрээнд Хятад болон АНУ-д 'Curry Brand'-ийн хамтарсан дэлгүүрүүдийг нээхээр төлөвлөж байна" хэмээн ярьжээ.

 

"Голден Стэйт Уорриорс" багийн холбогч Стефен Карри бол өнөө цагийн спортын ертөнцийн хамгийн алдартай эрхэмүүдийн нэг юм. Тэрээр NBA-гийн 4 удаагийн аварга бөгөөд лигийн түүхэн дэх хамгийн шилдэг шидэгч гэдгээрээ олон нийтэд хүлээн зөвшөөрөгдсөн билээ.

Стефен Карри Хятадын "Li-Ning" брэндтэй гэрээ байгуулснаа зарлалаа