АНУ-ын Гадаад хэргийн яам 75 орны иргэдэд олгох цагаачлалын визийн (immigrant visa) боловсруулалтыг түр хугацаагаар зогсоох шийдвэр гаргаснаа албан ёсоор мэдэгдлээ.

 

Тус шийдвэр нь АНУ-д байнгын оршин суух эрх буюу green card олгох визийн ангилалд хамаарах бөгөөд 2026 оны 1 дүгээр сарын 21-нээс эхлэн хүчин төгөлдөр хэрэгжихээр төлөвлөгдөж байна. Харин аялал жуулчлал, бизнес, суралцах зэрэг түр визийн ангилалд хамаарахгүй гэдгийг албаныхан онцолжээ.

 

Шийдвэрийн шалтгаан

 

АНУ-ын Гадаад хэргийн яамнаас мэдээлснээр уг алхам нь:

 

Цагаачлалын виз хүсэгчдийн санхүүгийн чадамжийг илүү нарийн шалгах, “Public charge” буюу төрийн халамж, нийгмийн тусламжид хамаарах магадлалтай өргөдөл гаргагчдыг эрт илрүүлэх, Цагаачлалын визийн шалгалт, хяналтыг сайжруулах зорилготой гэж тайлбарласан байна.

 

Ямар орнууд хамрагдсан бэ?

 

Нийт 75 улс уг түр зогсоолтод хамрагдсан бөгөөд Африк, Ази, Латин Америкийн бүс нутгийн олон улс багтжээ. Албан ёсоор нийтлэгдсэн мэдээллээр Монгол Улс энэ жагсаалтад багтсан байна. 

 

Олон улсын хариу үйлдэл

 

Энэхүү шийдвэр нь олон улсын хэмжээнд маргаан дагуулаад байгаа бөгөөд зарим хүний эрхийн байгууллагууд уг арга хэмжээг хэт өргөн хүрээтэй, эмзэг бүлгийн иргэдэд сөрөг нөлөө үзүүлж болзошгүй хэмээн шүүмжилж байна.

 

АНУ-ын тал харин уг арга хэмжээ нь түр хугацааны шинжтэй бөгөөд цаашдын үнэлгээ, бодлогын өөрчлөлтөөс шалтгаалан дахин хэлэлцэх боломжтой гэдгийг мэдэгдлээ.

АНУ: Цагаачлалын визний хоригтой 75 улсад Монгол Улс багтав