Дэлхийн хамгийн хурдтай хөгжиж буй хотуудын нэг Дубай нисдэг такси буюу хотын агаарын тээврийн шинэ системийг бодит хэрэглээнд нэвтрүүлэхэд бэлтгэж байна. Энэхүү төсөл хэрэгжсэнээр Дубай нисдэг таксийг өдөр тутмын тээврийн хэрэгсэл болгон ашигласан дэлхийн анхны хотуудын нэг болох боломжтой юм.

 

Цахилгаан хөдөлгүүртэй, босоо чиглэлд хөөрч буудаг нисдэг такси нь уламжлалт зам шаардагдахгүй, дуу чимээ багатай, байгаль орчинд ээлтэй. Хотын хамгийн ачаалалтай чиглэлүүдийн зорчих хугацаа эрс богиносож, жишээлбэл, нисэх буудлаас хотын төв хүртэл автомашинаар 45–60 минут зарцуулдаг замыг 10–12 минутын дотор туулах боломж бүрдэхээр төлөвлөжээ.

 

Анхны маршрутууд нь нисэх буудал, Downtown Dubai, Palm Jumeirah, Dubai Marina зэрэг стратегийн бүсийг хамарна. Хотын чухал цэгүүдэд нисдэг таксины буудлууд буюу vertiport-ууд баригдах бөгөөд өндөр барилгын дээвэр болон тусгай талбайд байрлах юм.

 

Нисдэг такси нь нэг нисгэгч, дөрвөн зорчигч тээвэрлэх хүчин чадалтай, нэг удаагийн цэнэгээр 100–160 км нисэх боломжтой. Онцгой нөхцөлд автомат аюулгүй буулт хийх системтэй бөгөөд эхний шатанд VIP ангиллын үйлчилгээ хэлбэрээр ажиллана. Технологи хөгжихийн хэрээр үнэ буурах төлөвтэй.

 

Төслийн албан ёсны төлөвлөгөөгөөр 2026 онд туршилт болон анхны арилжааны нислэгүүд эхлэх бөгөөд 2027 оноос илүү өргөн хүрээнд ашиглах, чиглэлүүдийг нэмэгдүүлэхээр төлөвлөжээ. Шинжээчдийн үзэж буйгаар нисдэг такси нь зөвхөн тансаг үйлчилгээ биш, харин ирээдүйн хотын зайлшгүй хэрэгцээтэй тээврийн систем болж, замын түгжрэл, цаг хугацааны алдагдал, агаарын бохирдлыг бууруулах чухал шийдэл болох юм

2026 онд Дубайд нисдэг таксигаар зорчно