АНУ-ын Ерөнхийлөгч асан Дональд Трамп болон ОХУ-ын Ерөнхийлөгч Владимир Путин нар энэ пүрэв гарагт утсаар ярьж, Орос-Украины дайн, Ойрх Дорнодын нөхцөл байдал зэрэг дэлхий нийтийн анхаарлын төвд байгаа асуудлуудыг хэлэлцлээ. Хоёр удирдагчийн яриа нэг цаг орчим үргэлжилсэн байна.

Кремлийн мэдээлснээр, Трамп ярианы үеэр Украин дахь цэргийн ажиллагааг аль болох түргэн зогсоох хэрэгтэй гэсэн байр сууриа дахин илэрхийлжээ. Харин В.Путин ОХУ хэлэлцээ хийхэд нээлттэй гэдгээ илэрхийлсэн ч, “цэргийн тусгай ажиллагааны зорилгоос ухрахгүй” хэмээн хатуу мэдэгдсэн байна.

Ярианы дараа Дональд Трамп сэтгүүлчдэд мэдээлэл өгөхдөө, уг уулзалт “ямар ч ахиц дэвшил авчраагүй” хэмээн дүгнэжээ. Мөн тэрээр Украины нөхцөл байдалд “сэтгэл дундуур” байгаагаа илэрхийлсэн байна. Трампын хэлснээр, АНУ Украинд маш их хэмжээний зэвсэг нийлүүлсэн бөгөөд энэ нь бараг улсаа хоосолж байгаатай адил гэжээ. “Бид өөрсдөдөө хангалттай зэвсэг байгаа эсэхэд итгэлтэй байх хэрэгтэй” хэмээн тэр онцолсон байна.

Хоёр тал цаашид биечлэн уулзах эсэх, мөн Орос, Украины гурав дахь шатны хэлэлцээ хэдийд Истанбулд болох талаар тодорхой тохиролцоонд хүрээгүй байна.

Түүнчлэн Трамп, Путин нар Иран, Сири болон Ойрх Дорнодын бүс нутгийн ерөнхий нөхцөл байдлыг авч хэлэлцжээ.

Энэ нь хоёр удирдагчийн зургаа дахь удаагийн утасны яриа бөгөөд өмнөх яриа нь зургаадугаар сарын 14-нд болсон бөгөөд мөн нэг цаг орчим үргэлжилсэн байна.