Өмнөд Солонгосын технологийн салбарын манлайлагч “Samsung Electronics” компани Америкийн цахилгаан автомашины тэргүүлэгч “Tesla” компанитай урт хугацааны стратегийн түншлэлийн гэрээ байгуулжээ. Энэхүү гэрээний хүрээнд “Samsung” нь Tesla-д зориулан бичил схемийн бүрдэл хэсгүүдийг нийлүүлэх бөгөөд нийт гэрээний дүн 16.5 тэрбум ам.долларт хүрч байгаа юм. Гэрээ 2033 он хүртэл хэрэгжинэ.

Бичил чипийн зах зээлд байр сууриа хэсэгчлэн алдаад байсан Samsung-ийн хувьд энэ нь дахин сэргэлт хийх томоохон боломж болж байна. Харин Tesla компанийн хувьд өсөн нэмэгдэж буй үйлдвэрлэлийн хэрэгцээгээ хангахын тулд найдвартай, өндөр хүчин чадалтай түнш шаардлагатай байсан нь энэхүү гэрээг бий болгоход хүргэжээ.

Нөгөө талаар, ижил төрлийн бүтээгдэхүүн нийлүүлдэг Тайванийн TSMC компани захиалгын дарамтад орж, гэрээт хугацаанд бүтээгдэхүүн нийлүүлэхэд хүндрэлтэй байгаагийн улмаас Samsung илүү тогтвортой, найдвартай эх үүсвэр болж байгаа нь анхаарал татаж байна.

Хоёр компани аль аль нь 2 нанометрийн нарийвчлалтай чип үйлдвэрлэх технологид шилжих чиглэлд идэвхтэй ажиллаж байгаа нь энэхүү түншлэлийн ирээдүйд технологийн өндөр түвшний үр дүнг авчрах магадлалтайг илтгэж байна.