Хагас зуун жилийн өмнө тасарсан сансрын түүхийн шинэ бүлэг эхлэхэд ойрхон ирлээ. АНУ-ын Үндэсний агаарын тээвэр, сансрын захиргаа (NASA) "Artemis" хөтөлбөрийн хүрээнд сар руу дахин хөл тавих бэлтгэл ажлаа албан ёсоор базааж, хөөрөлтийн тооллогоо эхлүүлснээ зарлалаа.

 

1972 оны "Аполлон 17" хөлгөөс хойш сарны гадаргуу дээр хүний мөр гараагүй билээ. Харин энэ удаагийн "Artemis" хөтөлбөр нь өмнөх нислэгүүдээс илүү өргөн цар хүрээтэй, илүү дэвшилтэт технологи дээр суурилж байгаагаараа онцлог юм. NASA-гийн зүгээс энэ удаа зөвхөн очиж үзээд буцах бус, саран дээр тогтвортой бааз байгуулах, цаашлаад Ангараг гараг руу хийх аяллын дамжлага станцыг бэлтгэх зорилготой ажиллаж байна.

 

Энэхүү даалгаврын хүрээнд сарны гадаргуу дээр анх удаа эмэгтэй сансрын нисгэгч болон өнгөт арьст нисгэгч хөл тавих түүхэн үйл явдал тохионо. Мөн эрдэмтэд сарны өмнөд туйлд буухаар төлөвлөж байгаа бөгөөд тэндээс усны нөөц (мөс) олж илрүүлэх нь ирээдүйн сансрын станцуудыг хүчилтөрөгч болон түлшээр хангахад шийдвэрлэх үүрэг гүйцэтгэх юм.

 

"Artemis I" даалгавар амжилттай хэрэгжиж, хөлгөө хүнгүйгээр туршсан бол одоо "Artemis II" болон "Artemis III" шатууд дараалан хүлээгдэж байна. Олон улсын сансрын агентлагууд болон хувийн хэвшлийн технологийн компаниуд (SpaceX, Blue Origin) энэхүү төсөлд хамтран ажиллаж, сансрын шинэ эрин үеийг хамтдаа нээж байна.

 

 

Хүн төрөлхтөн сансрын гүнд хөл тавьж, өөр гараг дээр амьдрах боломжийг эрэлхийлж буй энэхүү мөч дэлхий нийтийн анхаарлын төвд байна.

 

 

Хүн төрөлхтөн сар руу эргэн очиход бэлэн боллоо